Say Panagpulong na Panarian so Ontutulong a Mangiliktar na Bilay!
1 Satan so sanka-importantian a kimey a nagagawa ed mundo natan. Si Jehova a Dios, si Jesu-Kristo, tan saray nilaksalaksan anghel so maniimaton ed satan. Anto itan, tan akin a makana itan? Satan et say panangipulong na Panarian, tan ontutulong itan a mangiliktar na bilay!—Roma 1:16; 10:13, 14.
2 Nayarin liknaen na arum a totoo a nagkalalon natulongan tayo so arum no mibiang itayo ed pamaaligwas ed sosyedad a kawalaan tayo. Dakel so okupado ed pansasagpot a nadampot so kareenan, natambal so sakisakit, odino napaaligwas so ekonomya. Balet anto so peteg a makatulong ed totoo?
3 Sakey a Matalonggaring a Kimey: Say mensahe na Panarian lambengat so mangipapaliwawa ed gagala na bilay, say sengegan na paniirap na too, tan say mogmon napanmatalkan ya ilalo parad arapen. Say maong a balita so ontutulong ed totoon magmaliw a kakaaro nen Jehova tan diad ontan et mangawat na “deen na Dios, a talonaan ton amin a pakatalos.” (Fil. 4:7) Say mensahe na Panarian so alenleneg a mangitatarya na praktikal a giya ya ontulong natan ed totoo a manalona ed saray problema ed bilay tan mangipapaliwawa no panon a niliktar sano naderal la so marelmeng a mundo diad arapen. (1 Juan 2:17) Agta makagunggonan tuloy so pansagpot tayo ed panangipulong na Panarian?
4 Pian iyilustra: Anto so sankaabigan a paraan a panulong ed saray nanaugip a taga-baryo a napepeligro ed paganigani lan nabuang a dam? Limasan so natetebag lan dam? Parakepen so walad kapeligroan lan baryo? Andi! Kaukolan a bangonen iray taga-baryo, pasakbayan ira ed onsasabin desyang, tan tulongan iran makalegyas! Saramay nanaugip ed espiritual natan so walad pirmin kapeligroan. (Luc. 21:34-36) Lapud magano lan naandi iyan sistema na bengabengatla, panggunaetan tayo so manpulong tekep na inkaganatan ed amin a naromog tayo!—2 Tim. 4:2; 2 Ped. 3:11, 12.
5 Mantultuloy ed Satan: Mananap itayoy paraan pian nipasabi a nagkalalo so maong a balita ed masimoon a totoo—diad kaabungan da, diad karsada, panamegley na telepono, tan diad impormal a paraan. Say kimey ya inter nen Jehova a gawaen tayo so sanka-importantian a kimey a posiblin nagawaan tayo. No maseseg tayon sumpalen itan, ‘nilaban tayo so inkasikatayo tan saray ondengel met ed sikatayo.’—1 Tim. 4:16.