Repaso ed Teokratikon Eskuelaan Parad Panagministro
Kaput-libron repaso ed materyal a kinobrian ed saray asainmin ed Teokratikon Eskuelaan parad Panagministro a para ed saray simba na Mayo 7 ya anggad Agosto 20, 2001. Usaren so akabiig a peligo na papel a pangisulatan ed saray ebat ed anggan panon a karakel na tepet a nayarian yo diad nigeter a panaon.
[Imanoen: Legan na insulat a repaso, say Biblia lambengat so nayarin usaren diad pangebat ed anggan anton tepet. Saray reperensya ya ontumbok ed saray tepet so para ed personal a pansukimat yo. Saray pahina tan numero na parapo so nayarin ag-ompatnag ed amin a reperensya ed Say Panag-Bantayan.]
Ebatan so kada onggendan iran balikas na Tua o Tila:
1. Say pikakasin atukoy ed Nehemias 2:4 et nipaakar ed inka-desperado, lapud anggapo lay nagawaan. [Sinimban babasaen ed Biblia; nengnengen so w86 2/15 p. 25 par. 8.]
2. Say salitan “kongregasyon” so nipatalos manlapud Griegon salitan ek·kle·siʹa, a nisipor ed satan a termino iray ideyan pankakasakey tan pantutulongan. [w99 5/15 p. 25 par. 4]
3. Anggaman papaliisan na saray lingkor nen Jehova iray sumlang ed Salitay Dios a kaugalian a nisiglaot ed ipapatey, agda ipupulisay ya amin so kaugalian a nisiglaot ed ipapatey. (Juan 19:40) [rs p. 102 par. 4]
4. Diad panaon a nambilay si Job, sikato lambengat so toon matoor ed si Jehova. (Job 1:8) [Sinimban babasaen ed Biblia; nengnengen so w92 8/1 p. 31 pars. 3-4.]
5. Lapud katuaan a si Saulo, odino Pablo so nanggagawa na saray tolda pian nalegpet toy inkasikato et mangipapanengneng a sikatoy mairap-bilay. (Gawa 18:2, 3) [w99 5/15 p. 30 par. 2–p. 31 par. 1]
6. Anggaman si David so akapigawaay seryoso iran kasalanan, nibaga nen Jehova nipaakar ed sikato a “tinumbok to ak ed simoon a puso to” lapud magbabawin awawey tan maong iran kalidad nen David. (1 Ara. 14:8) [w99 6/15 p. 11 par. 4]
7. Nilikud no aliwan Makasulatan so bengatlan insipan tayo, gawaen tayoy anggaay nayarian tayo a tooren iray insipan tayo anggano namoria tayo ed saginonor a mairap so panggawa ed satan. (Sal. 15:4) [Sinimban babasaen ed Biblia; nengnengen so w89 9/15 p. 28 par. 5.]
8. Ipapanengneng na Salmo 22:1 a lapud pananesdes et temporaryon kinmapuy so pananisia nen David. [Sinimban babasaen ed Biblia; nengnengen so w86 8/15 p. 20 par. 19.]
9. Nayarin “natumba” so sakey a Kristiano lapud pamaakaran iran nisisiglaot ed impakasaew, impakadismaya, tan impakaperdi unong ed ley odino pinansyal, balet diad tulong na espiritu na Dios tan ed saray maaron managdayew To, sikato so agsigpot a ‘nibalsak’ ed espiritual a paraan. (Sal. 37:23, 24) [Sinimban babasaen ed Biblia; nengnengen so w86 11/1 p. 30 par. 14.]
10. Ibabangat na Genesis kapitulo 1 a pinalsa na Dios so amin a bengatla ed tapew na sayan dalin diad loob na anemiran agew a san-24 oras. [rs p. 126 par. 1]
Ebatan so onggendan iran tepet:
11. Panon ya ‘inter di Esdras tan saray katulongan to so belas’ na Ganggan? (Neh. 8:8) [Sinimban babasaen ed Biblia; nengnengen so w86 2/15 p. 26 par. 4.]
12. Manlapud anto so pakagamoran ed “liket nen Jehova”? (Neh. 8:10) [Sinimban babasaen ed Biblia; nengnengen so w86 2/15 p. 26 par. 9.]
13. Akin ya abendisionan iramay ‘mabulbulos a nanayam ed Jerusalem’? (Neh. 11:2) [Sinimban babasaen ed Biblia; nengnengen so w86 2/15 p. 26 par. 12.]
14. Akin a pinaleenan ni nen Ester so pangipaamta ed ari nipaakar ed say espisipikon pegdat to? (Ester 5:6-8) [Sinimban babasaen ed Biblia; nengnengen so w86 3/15 p. 24 par. 18.]
15. Anton duaran importantin tepet so naebatan ed libro na Job? [si p. 95 par. 1]
16. Akin ya adismaya tan ag-apaseseg si Job ed simbawa nen Elifaz? (Job 21:34; 22:2, 3) [Sinimban babasaen ed Biblia; nengnengen so w95 2/15 p. 27 par. 5-6.]
17. Anto so sakey a salmo? [si p. 101 par. 2]
18. Anton “maapan bengatla” so “memeremereen” na saray nasyon, a singa nirekord ed Salmo 2:1 [NW]? [Sinimban babasaen ed Biblia; nengnengen so w86 8/15 p. 20 par. 5.]
19. Anton praktikal a leksion nipaakar ed agpanangidumaduma so naaralan tayo manlapud ministeryo nen Felipe a mangilalanor ed saray Samaritano tan say Etiopen opisyal? (Gawa 8:6-13, 26-39) [w99 7/15 p. 25 par. 2]
20. Panon nen Job ya inyilustra so kombiksion to a nayarian na Dios a sikatoy paolien manlapud lubok, a minoria to bilang lugar ya amotan manlapud saray problema to? (Job 14:7, 13-15) [Sinimban babasaen ed Biblia; nengnengen so w00 5/15 p. 27 par. 7–p. 28 par. 1.]
Iter so salita o balikas a nakaukolan pian nakompleto so kada onggendan iran balikas:
21. Inkuan na Ester 8:17, unong ed New World Translation, a saray totoo so “mangipapakabat a sikaray Judios”; mipadpara natan, say “․․․․․․․․” na “arum a karnero” so angalay talindeg da ed dapag na saray ․․․․․․․․. (Apoc. 7:9; Juan 10:16; Zac. 8:23) [Sinimban babasaen ed Biblia; nengnengen so w86 3/15 p. 25 par. 14.]
22. Singa ipapanengneng na Gawa 1:7, anggaman si Jehova so sankamaimanoan no nipaakar ed ․․․․․․․․, say agew na pikuekuentaan to so onsabi a singa ․․․․․․․․, sano agnataltalaranan na totoo itan. (2 Ped. 3:10) [w99 6/1 p. 5 par. 1-2]
23. Diad 2 Pedro 3:7, 10, saray termino a “saray tawen” tan “dalin” so nausar diad ․․․․․․․․; a singa ipapanengneng na konteksto, say “dalin” so manutukoy ed ․․․․․․․․. [rs p. 114 par. 2-4]
24. Say makagunggonan komunikasyon so nagawaan diad panamegley na kompiyansa, talek, tan pakapantalosan, tan niwala irayan kalidad sano momoriaen so panamaley bilang ․․․․․․․․ a relasyon tan walay puron ․․․․․․․․ a patalonaen itan. [w99 7/15 p. 21 par. 3]
25. Say positibon impluensia na saray kalimog so makatulong ed sikatayo ta pian saray kakaukolanen ed moral tan espiritual so ․․․․․․․․ tan diad ontan et natulongan itayon makapanlingkor ed si Jehova ya ․․․․․․․․. [w99 8/1 p. 24 par. 3]
Pilien so dugan ebat ed kada onggendan iran balikas:
26. Ipapatnag na ‘panyudyurong [nen Mardokeo] ed wangalan na ari’ a sikatoy (guardia na ari; sakey ed saray opisyal nen Arin Ahasuero; manatalaran a mituyaw ed ari). (Ester 2:19, 20) [Sinimban babasaen ed Biblia; nengnengen so w86 3/15 p. 24 par. 9.]
27. Unong a nirekord ed Job 19:25-27, imbalikas nen Job so pananisia a ‘nanengneng to so Dios’ diad paraan a sikatoy (napagamoran na sakey a pasingawey; napaoli ed mangatatawen a bilay; nalukasan iray mata na pakatalos to ed katuaan nipaakar ed si Jehova). [Sinimban babasaen ed Biblia; nengnengen so w94 11/15 p. 19 par. 17.]
28. Si Job so natandaan a maong lapud (panangaro; panangasi; panagsungdo) to. (Sant. 5:11) [si p. 100 par. 41]
29. Say inkisulat na libron Salmos so onlaknab ed ngalngali (talonlasus; limanlasus; sanlibo) a taon. [si p. 101 par. 4]
30. Mapatnag a si (David; Asap; Esdras) so unor lan angiyuksoy ed libro na Salmos. [si p. 102 par. 6]
Ipetek so onggendan iran teksto ed saray balikas a nilista ed leksab:
Neh. 3:5; Sal. 12:2; 19:7; 2 Tim. 3:16, 17; Sant. 5:14-16
31. Sikatayo so nepeg a mabulos a mansakripisyo tan aleg a mapaatagey a mangipulisay, a momoriaen so mairap a kimey bilang ag-onnepeg ed dignidad tayo. [Sinimban babasaen ed Biblia; nengnengen so w86 2/15 p. 25 par. 12, 19.]
32. Say sakey a Kristianon alanor ed seryoson gawan-mauges so nepeg a mangipatua ed kasalanan to diad saray mamatatken. [rs p. 83 par. 9]
33. Anggaman inusar na Dios iray kugip pian mamasakbay, mamilin, tan manpropesiya ed saray totoo diad apalabas iran panaon, sikato natan so mangitatarya parad kilalaban tayo diad panamegley na impuyan a nisulat a Salita to. [rs p. 106 par. 2]
34. No kaliktan tayo so pikakaaro ed Dios, kaukolan a sikatayo so matua tan agmansimpisimpitan diad mental tan espiritual a paraan. [Sinimban babasaen ed Biblia; nengnengen so w89 9/15 p. 26 par. 7.]
35. Say katutulok ed ganggan na Dios so mamaligsa ed kamarerwa na sakey tan mamabulaslas ed pankaabigan na sakey. [Sinimban babasaen ed Biblia; nengnengen so w00 10/1 p. 13 par. 4.]