Saray Pakabat
◼ Opresin literatura ed Marso: Ipresenta so libron Pikakabat a panggunaetan so pangigapo na saray panangiyaral na Biblia. Abril tan Mayo: Saray kopya na Say Panag-Bantayan tan Awake! No walay naromog ya interesado ed panagpawil, iyopresi iray subscription. Iyopresi ed interesadon totoo so libron Pikakabat odino brosyur a Kakaukolanen, tan panggunaetan so pangigapo na saray panangiyaral na Biblia. Hunyo: Libron Pikakabat odino brosyur a Kakaukolanen tekep na gunaet a nigapo iray panangiyaral na Biblia.
◼ Onggapo ed Abril, saray manangasikaso na sirkito so mangiter na paliwawa ed publiko ya apauloan na “Uley na Too—Agetaran La” sano ombisita ed saray kongregasyon.
◼ Saray manangipalapag a manpirawat a man-auxiliary payunir ed Abril tan Mayo so nepeg a manplano la natan tan iter da lan masakbay iray aplikasyon da. Saya so ontulong ed saray mamatatken a manggawa na nakakaukolan iran uksoyan ed lawak na kimeyan tan nawalaan na magenap iran magasin tan arum a literatura pian walay nausar da. Say kangaranan na amin na saramay naaprobaan ya auxiliary payunir so nepeg ya iyanunsio ed kongregasyon.
◼ Say Memoryal so nagawa ed Simba, Abril 8, 2001. Anggapo iray miting a nagawa ed satan ya agew likud ed miting parad lawak na kimeyan. Saray mamatatken so makapanggawa na matukoy iran uksoyan parad Panagaral na Panag-Bantayan ya ikondukta ed arum ya agew.
◼ Panagbasa na Biblia ed Panaon na Memoryal: Amin so papasesegen a manbasa ed nisuherin parti na Biblia unong a ni-eskedyul ed 2001 Calendar tan ed Usisaen so Kasulatan ya Inagew-agew, ya onggapo ed Abril 3 tan mansampot ed agew na Memoryal, Abril 8.
◼ Saraman so mililimog ed sakey a kongregasyon so nepeg a mangipawit ed amin a balo tan pamasimbalo iran subscription parad Say Panag-Bantayan tan Awake!, pati saray personal a subscription da, diad panamegley na kongregasyon.
◼ Say Sosyedad so agmangisusuplay ed saray kerew na indibidual iran manangipalapag parad literatura. Say manangasikason manangimaton so nepeg a mangiyuksoy na pangiyanunsio a gawaen kada bulan sakbay ya ipawit ed Sosyedad so binulan a request na kongregasyon parad literatura ta pian amin ya interesado ed pakagamor na personal iran literatura so mangipaamta ed agin mangaasikaso na literatura. Ipangasin lawas nonoten no dinan iran publikasyon so special-request items.