Makapayaman ed Sikatayo so Panamendision nen Jehova
1 Mabetbet ya ibabase so itatalona na sakey a too ed kabaleg na sueldo to. Kanian moriaen na dakel a totoo a saramay makuarta et sikaray sankaliketan tan napnapnek. Balet, nalilingo iray totoo a manmorian say liket et nasaliw na kuarta. (Ecl. 5:12) Andiay magnayon a gayaga iramay “manpirawat ya onyaman” diad materyal a paraan. (1 Tim. 6:9) Diad pidumaan, talagan magayaga iray lingkor nen Jehova tan sikaray sankayamanan a totoo ed mundo. (Uli. 10:22; Apoc. 2:9) Panon ya ontan?
2 Pakapatnagan na Kayamanan Tayo: Walad sikatayo so mayaman ya aralem a pakatalos ed espiritual tan pakatalos ed Salitay Dios, say Biblia. Panamegley na mangaraldalin ya organisasyon nen Jehova, tuloytuloy to itayon ibabangat nipaakar ed inkasikato tan say Anak to, parad magnayon a nabang tayo. Lapu ed suston pakatalos et nayarian tayoy onapit ed si Jehova tan panggayagaan so maapit a relasyon ed sikato. (Sant. 4:8) Say pakatebek ed maong manlapud mauges tan panumbok ed saray ganggan na Dios so manalimbeng ed sikatayo manlapud saray sakit tan kapeligroan. Makapanmatalek itayo a taryaan itayo nen Jehova, a mansumpal ed maridios ya inkapnek tan kareenay nonot.—Mat. 6:33.
3 Panggagayagaan tayoy deen tan pankakasakey ed limog na espiritual ya impanaagi lapud babayuboan tayo iray bunga na espiritu na Dios. Lapud nankakasakey ed malet a bedber na aro, agtayo naliknan inkaindan itayo na Dios tayo odino saray agagi tayo sano makasagmak itayo na kalamidad.—Gal. 6:10.
4 Say bilay tayo so walaan na peteg a kabaliksan tan gagala. Ikuenta tayon alay abig a pribilihyo so pangipulong ed maong a balita ed sankagloboan. Mangiter iya na magnayon a gayaga leleg a tutulongan tayo so arum a nawalaay maabig a relasyon ed Dios tan nakaiba tayo ran manlingkor diad puron panagdayew. Say mabmablin kayamanan tayo nipaakar ed ministeryo so mamagalang ed si Jehova tan mangiter ed sikatayo na kapenek diad pitulongan tayo ed panamasantos na ngaran to. Pansiansiaen tayoy positibon awawey ed kanonotan, ta kabat tayon say ilalo tayo ed arapen so magano lan nagawa.
5 Ipanengneng so Apresasyon Tayo: Lawas tayo komon ya apresiaen iray bendision nen Jehova, a peteg a manggawa’d sikatayon sankayamanan a totoo ed dalin. (Uli. 22:4) Diad pangipanaon ed kada agew pian dalepdepen iray walad sikatayo so mamakiwas ed sikatayon pisalamatan si Jehova lapud mabunlok ya aro to tan pian itultuloy tayon iter ed sikato so nikabkabiig a debosyon tayo.