Kasin Papablien Yoy Inkaanos nen Jehova?
1 No agmaanos si Jehova ed loob la na apalabas a 10, 20, tan dakel nin taon, ya inyabuloy toy malaknab ya impanpulong, naaralan yo kasi so katuaan? Agaylan pisasalamat tayo ta inabuloyan to ni dakel a totoon ‘makagegemtan ed panagsibkel.’ Balet, say baleg ya agew na panangukom nen Jehova so “onsabi a singa matakew.” (2 Ped. 3:9, 10) Kanian, say inkaanos na Dios so ag-ipapasen bilang inkaabala diad pangitarok ed anggaan na sayan sistema na bengabengatla.—Hab. 2:3.
2 Panangabagey ed Totoo: Lalon palumbasan na andukey a panagtepel nen Jehova so pakatalos tayo. Agtayo nepeg ya ibaliwala so gagala na satan. (Jon. 4:1-4, 11) Sankanengneng nen Jehova so pakaskasin kipapasen na katooan kanian naabagey to ra. Ontan met so liknaan nen Jesus. Diad impangabagey to ed saray totoo a pinulongan to, kaliktan ton onlaknab so panag-ebanghelyon kimey pian dakel ni nawalaay pankanawnawa a makagamor na andi-anggaan a bilay.—Mat. 9:35-38.
3 Sano onsabi iray trahedya tan desyang, agtayo kasi nasibegan iray totoon agmakaamta ed katuaan? Saray totoo natan et singara “karnero ya andian na managpastol” diad panggugunaet dan talonaan tan talosan so kaguloan diad mundo. (Mar. 6:34) Diad maseseg a pangipulong ed maong a balita et naligliwa tayo iramay suston nikiling a puso tan nipanengneng tayo so panamabli tayo ed inkaanos nen Jehova.—Gawa 13:48.
4 Apuraan so Kimey Tayo: Nen katantaon et 323,439 so abautismoan tan masulok a 14,000,000 so inmatendi ed Memoryal. Agaylan posibli ni parad dakel pian makaliktar ed kaderal na sayan marelmeng a sistema! No kaunongan karakel so pagmaliwan na “baleg ya ulop” et agtayo amta. (Apoc. 7:9) No kaunongan kabayag ni kasumpal na kimey tayon manpulong et agtayo amta. Balet amta nen Jehova. Nipulong so maong a balita angga ed say kapenek to, “et saman la onsabi so anggaan.”—Mat. 24:14.
5 Antiktikey lay natitilak a panaon, tan asingger lay agew na Dios. (1 Cor. 7:29a; Heb. 10:37) Maseguron “asisingger ed sikatayo so kilalaban tayo nen sanen inmuna a sinisia tayo.” (Roma 13:11) Komon ta agtayo sasaewen a talosan so gagala na inkaanos na Dios. Imbes, apuraen tayo komon so mangipulong ta pian saramay dakel nin manpirawat parad inkatunong so nayarin makaeksperiensia ed baleg a panangasi nen Jehova.