Pansiansiaen so Maabig ya Ugali a Mangigloria ed Dios
1 Inerman so kawalaan tayo, say ugali, panangawes, tan panag-ayos tayo so mantasi nipaakar ed sikatayo tan ed Dios a dadayewen tayo. Saya so nagkalalo lan sankaimano diad angkabaleg iran pandaragup na totoo na Dios, no iner a dakel a totoon maniimaton ed sikatayo. Sano sikatayoy napanuliranan, nigloria so ngaran nen Jehova. (1 Ped. 2:12) Balet, say makapuy a walna odino palpalaran a kiwas diad biang na pigara et makapangitarok na kabalawan ed ngaran na Dios tan ed totoo to. (Ecl. 9:18b) No nodnonoten a lapud ugali tayo et walay nibaga na saray taga-paway ed organisasyon tayo tan say Dios a dadayewen tayo, nepeg a sinononot tayon ‘gawaen so amin a bengatla parad kigloriaan na Dios.’—1 Cor. 10:31.
2 Manepeg ya Ugali Dia ed Kombension: Antokaman so klase na pasilidad ya usaren, moriaen itan bilang baleg a Kingdom Hall legan na kombension. Napatnagan komon so manepeg a panangawes tan panag-ayos a singa sano onatendi tayo ed saray miting ed kongregasyon tayo. Namparan legan tan kayari na saray sesyon ed kombension, nepeg ya agmansulong iray agagi na agmasimpit odino agmanepeg ya uso iran kawes, a mangipatnag na espiritu na mundo tan manggawa’d sikatayon mairap ya ibiig bilang masimpit. Nepeg a maalwar iray agagin bibii a say estilo tan karukey na saray palda odino aysing da et matukoy tan masimpit. (1 Tim. 2:9, 10) Balanglan onatendi ed kombension, manpundo ed hotel, mangan ed restawran, odino mansasaliw, nepeg tayon ipatnag ed amin a panaon a sikatayoy miministro na Dios, ya aliwan sengeg na pakagapolan.—2 Cor. 6:3.
3 Nagaway bautismo no Sabado na kabuasan diad kombension. Adeskribe ed Abril 1, 1995, a Panag-Bantayan, pahina 30, so awawey a nepeg tayon ipatnag ed satan ya okasyon. Inkuan to a ‘nepeg tayo ya ipasen so bautismo ed matukoy ya inkaseryoso. Aliwan panaon itan a paneyag-eyag parad party, odino parad panliliket. Nisay satan so panaon na ermen.’ Talagan agmatukoy parad saramay nabautismoan a mangisulong na mapitpitat tan mankaninag a pampabasa, balanglan para lalaki odino bibii. Kanian, amin so nepeg a mangipatnag ed inkaseryoso tan say gayaga na Kristianon bautismo.
4 Manbalon Kayo ed Kombension: Kekerewen na Sosyedad ya amin tayo so manbalon na pangugtoan tayo ed kombension kada agew. Maslak ed saray agagi tayo so anumbok ed saray panangidirehi tan nalmoan a diad panangugto et nakarungo da ray kapamilyaan da pian kanen da so balon da. Dakel ya angikuan a makapaliket so pankanawnawan makapanrelaks legay panangugto tan makapituyaw na malaem ya oras ed saray agagi ra. Say sakey a rason no akin ya inulit lamet iyan bilin et lapud ta naimanon walaray agagi ya ontaynan ed auditoryum pian manaliw na kanen da ed saray asingger a managlako ed paway tan ed restawran. No manbalon lambengat iray amin ya agagi imbes a manaliw ni ed saray managlako ed paway, agla mantitipon irayan managlako ed saray puerta na pankokombensionan, a sengeg na panseseksekan tan agmarakep a nenengnengen.
5 Aliwan Panaon a Pannegosyo: Lapud say pankokombensionan et singa baleg a Kingdom Hall parad taloy agew, agnayarin mannegosyo iramay onatendi. Agmanepeg ed sakey ya agin anamoten toy kombension pian ipresenta so negosyo to, odino manggawa na saray bengatlan para lako, singa say apis na libro odino T-shirt, paypay, odino kalendaryo a niprinta so tema na kombension.
6 Pansiansiaen a Malinis so Pankokombensionan: No balang sakey ya agi et ibantak toy dili ton basura diad suston bantakan odino awiten itan ed abung, mamainomay iya pian napansiansian malinis so pankokombensionan. No akanengneng kayoy naplag a papel, dokdok yon tampol. Nepeg ya ibangat na atateng so ananak dan agmanbabantak ed flooring noagta ibantak iratan ed bantakan. No makapanboluntaryo kayon magano pian ontulong a linisan so pasilidad kayari na sesyon ed kada agew, naapresian maong iya.
7 Pinanonotan itayo nen Pedro no ‘anton nengneng na inkatoo so nepeg tayon pagmaliwan ed amin a masantos ya ugali tan gawa na maridios a debosyon.’ (2 Ped. 3:11) Komon ta saray salita tan kiwas tayo diad “Mananumpal na Salitay Dios” a Distriton Kombension so makatulong ed matuan-impanpuson maniimaton a naamtaan tan nadayew da so matalonggaring a Dios tayo, a sikato so makanepegan na amin a galang tan gloria.—1 Cor. 14:24, 25.