Pakaromog na Gayaga Diad Sagradon Serbisyo Yo
1 Pinmawil iran “sililiket.” Ibabagay salaysay na Biblia so liknaan na 70 a babangatan sanen imbalita ra ed si Jesus so agawa, kayari na malaknab ya impanpulong da. Naeksperiensia ra so akindalem a liket lapud impanggawa ed linawa na Dios. (Luc. 10:17) Antoy makatulong ed sikayo pian nawalaan na miparan gayaga ed sagradon serbisyo?
2 Positibon Awawey: Walaan kayo na inter na Dios a pribilihyon mangipakabat ed totoo nipaakar ed engranden gagala nen Jehova. Lapud panagpulong yo, nayarin natulongan yon makabulos so sakey a too manlapud saray mabanday a kagagawa na sayan mundo tan ed panameget na palson relihyon. Nayarin iyopresi yo ed totoo so ilalon pambilay diad mundon andian na gotgotan ya akaliktob ed sikatayo natan. Isipen pay gayaga nen Jehova sano matalona yon itanem iray bukel na katuaan diad maawat a puso. Positibon ipikasi so espiritu na Dios a mamawalay bunga na gayaga leleg ya ipapapuso yon gagawaen so ministeryo.
3 Mausar a Panangipasal: Say sesyon na instruksion nen Jesus ed saray 70 a babangatan to so niyaliling ed modernon-agew a Service Meeting. Impasal to ra ta pian epektibo ran nasumpal so ministeryo ra. (Luc. 10:1-16) Natan, nipapasal kayo ed Service Meeting diad saray paraan na iyaasingger ed totoo, no panoy pangigapo na tongtongan, tan no panoy pangigapo tan pangikondukta na panangiyaral na Biblia. Diad pangikana ed inkasikayo tan pamaaligwas ed dunong yon manpulong, namoria yon naekal so antokaman a paniri-iri odino kakapuyan yo tan nadaeg iratan na kompiyansa tan gayaga.
4 Iteen so Imano ed Arapen: Nanggayaga si Jesus ed sagradon serbisyo to anggaman ed saray ir-irap a sinungdoan to. Akin? Lapud inteen ton maong so mata to ed saray bendision tan pribilihyo a walad arapen to. (Heb. 12:2) Nagawaan yo met so ontan diad pangiyapasakey ed nonot tan puso yo ed ngaran nen Jehova tan ed saray bendision ya onsabi diman ed balon mundo na Dios. Mangarum iya na gayaga tan kabaliksan ed ministeryo yo.
5 Say sankaabigan a pribilihyon niwala ed sikayo natan et say pangisaklang na sagradon serbisyo ed si Jehova. Sirin, komon ta nikuan yo: “Makaliket ak a mangunor na linawam, O Dios ko.”—Sal. 40:8.