Kasin Antam La?

Nensaman, panon dan aawiten ed arum a lugar so apoy?

DIAD salaysay na Biblia ed Genesis 22:6, nabasa ya pian niparaan nen Abraham so ibagat to diad arawin lugar, sikatoy angala na “kiew parad apay a popoolan tan impasakbat to itan ed si Isaac ya anak to. Insan inala toy apoy tan say kutsilyo, tan tinmuloy la ran dua.”

Anggapoy nabasa ed Biblia no panon ira nensaman ya manpaparangat na apoy. Nipaakar ed samay Genesis 22:6, walay nankomento ya samay apoy ya inawit nen Abraham tan Isaac et “imposiblin agnaerep ed andukey a biahe.” Kanian nayarin samay atukoy ed satan a teksto et saray uusaren ya pamparlang na apoy.

Balet ibabaga na arum ya mairap so manparlang na apoy nensaman. Mas mainomay ed saray totoo so onkerew na ngalab ed kaabay da no wala, nen say manparlang lamet ira. Kanian panisiaan na pigaran iskolar ya say inawit nen Abraham et sakey a pananginan​—nayarin sakey a banga ya walay bitbitan to—​a nankargay ngalab ya inalad nampoolan legay labi. (Isa. 30:14) Aawiten da iratan ya ngalab pian walay pamparlang day kiew diad biahe ra.