Pikakasi

6 Makatulong Kasi so Pampikasi?

TALAGA kasin natulongan itayo na pikakasi? Ipapanengneng na Biblia a say pikakasi et talagan makatulong ed saray matoor a lingkor na Dios. (Lucas 22:40; Santiago 5:13) Diad tua, baleg so nitulong na pikakasi ed espiritualidad tan emosyon tayo, tan maong ingen so epekto na satan ed laman tayo. Panon?

Alimbawa, isip mo pan akaawat na regalo so anak mo. Kasin ibangat mon basta nalikna toy panangapresya ed samay regalo et susto la? Odino ibangat mon ibalikas toy pisasalamat to? No ibalikas tayo iray nalilikna tayo, mas naikdan tayo iratan na imano tan mas ontatak ed puso tayo. Ontan met kasi resulta no ibalikas tayoy nalilikna tayo ed Dios? On! Nia ray pigaran alimbawa.

Pikakasi na pisasalamat. Sano pisalamatan tayoy Ama tayo ed amin a maong a bengatlan nagagawa’d bilay tayo, saray bendisyon so sankanonot tayo. Bilang resulta, magmaliw tayon mas maapresya, mas maliket tan mas positibo.​—Filipos 4:6.

Alimbawa: Imbalikas nen Jesus so pisasalamat to ta dinengel tan inebatan nen Ama to so pikakasi to.​—Juan 11:41.

Pikakasi parad panamerdona. Sano onkerew tayo’d Dios na panamerdona, mas determinado tayon napansiansian malinis so konsiensia tayo, mas nalikna tayoy panagbabawi, tan lalo tayon namoria a say kasalanan et seryoson bengatla. Nainawaan itayo met ed pakakakonsiensia tayo.

Alimbawa: Nampikasi si David pian ibalikas so ermen tan pagbabawi to.​—Salmo 51.

Pikakasi parad direksion tan karunongan. Natulongan itayon magmaliw a tuan mapaabeba no kerewen tayo’d Dios so direksion tan karunongan a kaukolan tayo pian makapanggaway maong iran desisyon. Napanonotan itayon walaray limitasyon tayo tan ombiskeg so talek tayo ed Ama tayo ed tawen.​—Uliran 3:5, 6.

Alimbawa: Mapaabeban kinmerew si Solomon na direksion tan karunongan a kaukolan to ed panuuley to ed Israel.​—1 Arari 3:5-12.

Pikakasi sano napapagaan. No ibesngaw tayo’d Dios so walad puso tayo sano napapagaan, nainawaan itayo tan mas manmatalek tayo ed si Jehova imbes a diad sarili tayo.​—Salmo 62:8.

Alimbawa: Nampikasi si Arin Asa sanen kaukolan toy miguerra ed dakerakel a kalaban.​—2 Awaran 14:11.

Pikakasi parad pankaabigan na arum. Ontulong iray onian pikakasi pian nalabanay inkasiblet, magmaliw itayon mas mapangasi, tan naaralan tayoy milikna’d arum.

Alimbawa: Impikasi nen Jesus iray patumbok to.​—Juan 17:9-17.

Pikakasi a mangidadayew. Sano idayew tayoy Jehova lapud makapakelkelaw iran gawa to tan mararakep iran kualidad to, onaralem so respeto tan apresasyon tayo’d sikato. Ontulong met iray ontan a pikakasi pian mas onapit itayo ed Dios tan Ama tayo.

Alimbawa: Indaydayew nen David so Dios lapud saray palsa to.​—Salmo 8.

Say sakey nin bendisyon ya iter na pikakasi et “say deen na Dios a palumbasan toy amin a kanonotan.” (Filipos 4:7) Diad sayan magulon mundo et talagan bendisyon so pakawalaay kalmadon puso. Maong ingen so epekto na satan ed laman tayo. (Uliran 14:30) Balet ta kasin naawat tayo irayan gunggona na pikakasi dia labat ed sarilin sagpot tayo? Odino wala ni mas importante nen saray sagpot tayo?

[Blurb ed pahina 10]

Baleg so nitulong na pikakasi​—diad laman tayo, emosyon, tan lalo la’d espiritualidad tayo