Impakalmo ed Inyamot Iran Kayamanan
ASALIM ta lay akalmo na inyamot a kayamanan diad pasen ya agmon balot inisip a pakaromogan mo? Nen Marso 27, 2005, ontan so agawa ed si Ivo Laud, sakey ed saray Tasi nen Jehova diad Estonia. Tutulongan toy Alma Vardja, sakey met a Tasi a maedad la, a mangigeba ed daan lan melag a bodega. Legan dan babagbagen so dingding, naimano ray sakey a tabla ya akasanib ed lusek. Nen inekal da so tabla, anengneng dan walay sekreton pananginan a manga 4 pulgada kaawang, 50 pulgada karukey, tan 4 pulgada kaaralem, a walaan na kapot a tabla. (1) Ditan inyamot iray kayamanan! Anto iratan a kayamanan? Siopay angiyamot ditan?
Diad satan a pananginan et walaray bengatlan abalbalkot na makapal a papel. (2) Saratan manayan abalbalkot et literatura na saray Tasi nen Jehova, a kaslakan et artikulon aaralen diad Panag-Bantayan, tan say arum et apetsaan ni na 1947. (3) Maal-alwar irayan insulat ed lenguahen Estonian. Arum ed saratan et nabidbir no siopay angiyamot. Rekord iratan na interogasyon ed masiken nen Alma, si Villem Vardja. Aromog met ditan iray impormasyon nipaakar ed saray taon na inkipriso to. Akin kasi et sikatoy impriso?
Si Villem Vardja et walaan na responsabilidad diad Kongregasyon na saray Tasi ed Tartu tan agnambayag et dia met ed Kongregasyon na Otepää diad Estonia, sakey a datin kabiangan na Soviet Socialist Republics. Nayarin antis na Guerra Mundial II et naaralan to so katuaan a walad Biblia. Kayari pigaran taon, nen Disyembre 24, 1948, legan na uley na Komunista, si Agin Vardja et inaresto lapud pampupulong to. Sikatoy tinetepetan tan minaltrato na saray sekreton pulis tan pinasoot dan alaen iray kangaranan na kapara ton Tasi. Agda met inikdan na pankanawnawan idepensay inkasikato ed korte. Tan sikatoy asentensiaan na pakaprisoy samploy taon diad kampo na Russia.
Nanmatoor si Villem Vardja ed si Jehova anggad impatey to nen Marso 6, 1990. Ag-amta na akulaw to a walaray inyamot ton literatura. Nayarin labay ton protektaan so akulaw to no bilang ta walay interogasyon. Akin et kaukolan to nin iyamot iray literatura? Lapud say Soviet State Security Committee, say KGB, so mabetbet a bigla-biglan onloloob ed kaabungan na saray Tasi nen Jehova pian mananap na saray babasaen nipaakar ed relihyon. Nayarin angiyamot si Agin Vardja na literatura pian naseguron wala nin siansiay nitaryan espiritual a tagano no bilang ta nakompiska na KGB iray suplay a literatura. Wala ni ray arum ya inyaamot a literatura a nalmo nen tiagew na 1990. Say sakey et diad Tartu, abalaten ya Estonia. Inyamot met itan nen Villem Vardja.
Akin et tinawag tayon kayamanan irayan literatura? Lapud sarayan kopya a maan-anos ya insulat tan maal-alwar ya inyamot so pakapatnagan na apresasyon na saray Tasi ed espiritual a tagano a nitatarya ed saman a panaon. (Mat. 24:45) Kasin aapresyaen mo iray espiritual a probisyon a naaawat mo natan? Kaiba ed saratan so Say Panag-Bantayan ed lenguahen Estonian tan ed masulok a 170 ni ran lenguahe.