Onapit ed Dios
‘Aligen so Dios’
ANOS. Panangasi. Panamerdona. Aro. Makapaermen ta mataltalag la natan iray totoon mangipapatnag na ontan iran kalidad. Sikayo ey, kasin alikna yo la ya anggan antoy gawaen yo et agyo nipatnag irayan maabig a kalidad? Nayarin ipilit na makritikon puso tayo a say dati lan mauges a kagagawa odino ansakit ya eksperiensya ed apalabas, so makasengeg no akin ya imposible parad sikatayo a nipatnag irayan maabig ya ugali. Anggaman ontan, ibabangat ed sikatayo na Biblia iyan segseguradon katuaan—amta na Manamalsa tayo a sarag tayon ipatnag irayan maabig a kalidad.
Sisimbawaen na Salita na Dios iray tuan Kristiano: “Aligen yo sirin so Dios, singa anak to kayon inar-aro.” (Efeso 5:1) Ipapanengneng na saratan a marakdakep a balikas a walay kompiyansa na Dios ed saray managdayew to. Panon? Pinalsa nen Jehova a Dios so totoo unong ed indengan To. (Genesis 1:26, 27) Sirin, pinalsa na Dios iray totoo a walaan na kalidad a mipara ed sikato.a Kanian, sanen pinaseseg na Biblia iray Kristiano ya “aligen so Dios,” singa ibabagan mismo nen Jehova ed sikara: ‘Amtak a sarasarag yo itan a gawaen. Anggaman aliwa kayon perpekto, walaan kayo na abilidad a mangalig ed siak diad limitadon paraan.’
Anto ni ray arum a kalidad na Dios a sarag tayon aligen? Ebatan itan na saray akapaliber a bersikulo. Imanoen a say simbawa nen Pablo et walay kaiba to a salitan “sirin.” Walay koneksion na sayan salita ed akaunan bersikulo, ya anukoy ed anos, panangasi, tan panamerdona. (Efeso 4:32; 5:1) Insan, kayari na samay panamaseseg ya aligen so Dios, diad onsublay a bersikulo et imbaga nen Pablo ed saray Kristiano a manbilay tekep na agmakasarili ya aro. (Efeso 5:2) Segseguradon no nipaakar ed pangipatnag na anos, inkamapangasi, mabulos a panamerdona, tan panangaro, walaan itayo na sankaabigan ya alimbawa a nepeg ya aligen—si Jehova a Dios.
Akin et labay tayon aligen so Dios? Imanoen so mapuersan panamaseseg a kaiba’d imbaga nen Pablo: “Aligen yo sirin so Dios, singa anak to kayon inar-aro.” Agta makapalikliket iratan a salita? Momoriaen nen Jehova iray managdayew to bilang ananak ton inar-aro. Singa say ugaw a manasalin magmaliw a kapara na ama to, gawaen met na saray tuan Kristiano so anggaay nayarian dan mangalig ed mangatatawen ya Ama ra.
Agpipiliten nen Jehova iray totoo a mangalig ed sikato. Diad kabaliktaran, tratratoen to itayo tekep na dignidad diad impangiter to’d sikatayo na kawayangan a manpili. Kanian walad sikay desisyon no labay mon aligen so Dios odino andi. (Deuteronomio 30:19, 20) Anggaman ontan, agmo lilingwanan a walaan kay potensyal a mangipanengneng na saray kalidad na Dios. Siempre, pian naalig mo so Dios, nepeg mo nin kabaten iray kalidad tan dalan to. Say Biblia so ontulong ed sikan naaralan iray nipaakar ed Dios, a say agnaparaan a personalidad to et amakiwas ed minilyon a mangalig ed sikato.
[Paimano ed leksab]
a Ibabaga na Biblia a say inkapalsa na too unong ed indengan na Dios et walaan na koneksion ed inkatoo na sakey. Saramay malabay a mamaliket ed Dios so papasesegen a mangisulong na “balon inkatoo,” salanti, “pinalsa na Dios tan papasimbaloen to lawas unong ed indengan to.”—Colosas 3:9, 10, Maung a Balita.