Kasin Posible so Sankamundoan a Pankakasakey?

INER kasi pamapaarapan na mundo tayo, kareenan odino diad kadederal? Ompatnag a posible so anggan dinan ed satan a dua.

Diad sakey a dapag, mataletalek ya ibabaga na saray manuley a say sankagloboan a kareenan et sakey a kalat a nadampot. Ontan lagi so ibabaga ra, lapud ta no andi et makapakebkebbiew ya isipen iray nayarin nagawa. Saray arum balet et napapagaan a maong lapud oniaran tepet: Dinan kasi iran nasyon so walaan na armas a turobos no mamatey? Kasin ag-ira natatakot ya usaren iratan? Panon to la kasi no ontay gawaen da?

Ipapanengneng na saray agawgawa ed apalabas a say panlalaslasan tan diskriminasyon so abayag lan sengegan no akin a mairap so pankakasakey, tan say relihyon met, imbes a sebseban to so onaapuy a gotgotan na saray totoo, diad kaslakan et susungloran to laingen itan. Onia so insulat na dyurnalistan si James A. Haught: “Antokaman a bengatlan mangaapag ed totoo et nayarin pansengegay panamusol, tan say relihyon so sakey ed saray manunan mangaapag ed totoo. Anggaman momoriaen na karaklan a say relihyon et pagmaliwen ton ‘maong’ so totoo, mapatpatnag balet ya itutulak na satan so arum a manggaway teriblin kaugsan.” Ontan met so panmoria na autor a si Steven Weinberg: “Relihyon lambengat so makapangitulak ed sakey a maong a toon manggawa na mauges.”

Kasin wala ni ilalo a niwala so sankamundoan a pankakasakey? On! Balet aliwan say too so panlapuan odino dinanman ni a relihyon ya inletneg na too, unong a nakabatan tayo.

[Blurb ed pahina 3]

Kasin say mundo et singa granadan onsabog ed anggan anton oras?