“Piawat Yo pa so Simplin Regalok”

NABASA irayan salita ed sulat a naawat na sangan opisina na saray Tasi nen Jehova ed Russia. Kaiba ed sulat so baleg a kahon a napnoy makakapal a medyas.

Satan a regalo so impawit na 67 años a si Alla, a Tasi nen Jehova diad sakey a kongregasyon ed Russia. Si Alla so masulok lan samploy taon a manlilingkor ed si Jehova, a maseseg a mangipupulong ed maong a balita na Panarian. Balet, sikatoy naataki kanian biglan aparalisa so arum a parte na laman to. Anggaman ontan, si Alla so apakiwas na panangaro a manumbok ed alimbawa na Kristianon bii nen inmunan siglo a si Dorcas, a nanggawa na kawekawes parad saray kapananisiaan to.​—Gawa 9:36, 39.

Oniay insulat nen Alla: “Agko nigalaw iray ulpok, balet ta nigalaw ko ni iray limak. Kanian manpupulong ak diad panamegley na sulat.” Inyarum to ni: “Anggad nigalaw ko niray limak, man-gansilyo ak na pigaran paris na makakapal a medyas. Labay kon iter irayan medyas ed saray agagi a mangipapaalagey na saray Kingdom Hall diad ambetel iran pasen, a singa diad sakey a parte na Russia tan Siberia.”

Oniay inkuan nen Jesu-Kristo nipaakar ed saray tuan patumbok to: “Lapu ed saya amin a too nabirbiran da a sikayo ray babangatan ko, no wala so aro yo ed sakey tan sakey.” (Juan 13:35) Say onian panangaro ya impanengneng nen Alla so pakabidbiran na saray tuan babangatan nen Jesus.