“Anto so Katuaan?”

ONTAN so mainsulton intepet nen Gobernador Poncio Pilato na Roma ed si Jesus. Sikatoy ag-interesado ed ebat, tan agmet inebatan nen Jesus. Nayarin minoria nen Pilato a say katuaan et agbalot natalosan.​—Juan 18:38.

Say onian panagleglemew ed katuaan et naiimano met ed dakel natan, kaiba la ray pangulo na relihyon, managbangat, tan politiko. Panisiaan da a say katuaan, nagkalalo la say katuaan nipaakar ed moral tan espiritual, et aliwan absoluto noagta lawas manguman-uman. Ipapasagilig na satan sirin a sarag na totoo a desidien ed inkasikaran dili no anto so maong tan mauges. (Isaias 5:20, 21) Tan singa met la ibabaga na satan a sarag na totoo ya ipulisay iray ipapasen dan karaanan lan prinsipyo tan estandarte ed moral na saray imbebeneg a henerasyon.

Maabig ya imanoen imay imbaga nen Jesus a sengegay impantepet nen Pilato, sanen inkuan to: “Nisengeg ed saya nianak ak tan nisengeg ed saya linma ak dia ed mundo, pian tasian ko so katuaan.” (Juan 18:37) Parad si Jesus, say katuaan et malinlinew tan mainomay a talosan. Kanian, impaseguro to ed saray babangatan to: “Nakabatan yo so katuaan, et say katuaan sikayo so gawaen to a bulos.”​—Juan 8:32.

Pakaromogan kasi ed satan a katuaan? Aminsan et inkuan nen Jesus sanen manpipikasi ed Dios: “Say salitam sikato so katuaan.” (Juan 17:17) Say Biblia, a pinuyanan na Dios, so mangipaparungtal ed katuaan a mangiiter na napanmatalkan a giya tan seguradon ilalo ed arapen, salanti, say bilay ya andi-anggaan.​—2 Timoteo 3:15-17.

Anggapoy kakkainteres ya impulisay nen Pilato so pankanawnawan amtaen itan a katuaan. Sika ey, anto kasi reaksion mo ed pankanawnawan naamtaan itan a katuaan? Akin ta no itepet mo ed saray Tasi nen Jehova no anto itan a “katuaan” ya imbangat nen Jesus? Labalabay dan inabang itan a katuaan ed sika.