Kasin Nenengnengen Ka na Dios

KASIN makanengneng si Jehova, say Eksperton Manamalsa? On, siempre! Onia so malinlinew a katunongan na Biblia: “Say nanggawa na mata, agto kasi nanengneng?” (Salmo 94:9) Arawin dalin iray totoo no ikompara’d pakanengneng nen Jehova. Ta agto lambengat nanenengneng so paway tayo noagta ‘sasalien to met iray puso,’ tan sarag ton ‘simbangen iray kapusoan.’ (Uliran 17:3; 21:2) On, nabasa to no antoy walad nonot tayo, say motibo, tan niyamot iran pilalek tayo.

Amta nen Jehova iray paniirap tayo, tan eebatan to iray masimsimoon a kerew tayo. Oniay insulat na salmista: “Saray mata nen Jehova wala ra ed matunong a too, tan saray layag to akalukas ira ed saray akis da. Si Jehova asingger ed saray wala ed kipapasen na sakey a nabtagan na puso; tan ilaban to so totoo a wala ed sakey a kamarerwa a masakit ed panagbabawi.” (Salmo 34:15, 18) Talagan makapaligliwan naamtaan a natatalosan nen Jehova iray kipapasen tayo tan dedengelen toray intagleey iran pikakasi tayo!

Amta met nen Jehova a Dios iray gagawaen ed sekreto. On, ‘amin a bengatla so lakseb tan mapatnag ed saray mata na pangikdan tayo na bilang [odino say pikuentaan tayo].’ (Hebreos 4:13) Kanian balanglan say gagawaen tayo et maong odino mauges, naiimano iratan ya amin na Dios. (Uliran 15:3) Alimbawa, ibabaga na Genesis 6:8, 9 a “si Noe [et] akagamor na grasya ed saray mata nen Jehova” tan “akiulop-ulop ed [tuan] Dios.” On, agamoran nen Noe so panangabobon tan panamendisyon nen Jehova lapud katutulok to tan pananumpal to ed saray matunong a prinsipyo na Dios. (Genesis 6:22) Diad pidumaan, saramay totoo ed panaon nen Noe et bayolenti tan marelmeng. Aliwan bulag so Dios ed gagawaen da. Ta oniay inkuan na Biblia: “Anengneng to a say kabaglan na too ed dalin abalbaleg, tan mauges labat a lanang so amin a pimorekdek na nonot na puso to.” Kanian, sikaray dineral nen Jehova balet ta inliktar to si Noe tan say pamilya to.​—Genesis 6:5; 7:23.

Komusta ka balet, kasin naliliketan si Jehova no nanenengneng to ka? Saray mata nen Jehova so “ombatik dia tan diman ed amin a dalin, pian ompatnag a mabiskeg ya ontulong ed saray ayadyari puso ra a dapit ed sikato.” (2 Awaran 16:9) Agla manbayag et ekalen to lamet so amin a mauges ed dalin tan iliktar to iramay mauyamo so puso ra.​—Salmo 37:10, 11.