“Matoor a Tasi ed Tawen”

ABAYAG lan irarayew na saray manag-anlong tan managsulat na kanta so karakpan na bulan. Alimbawa, sasaglawien na impuyan na Dios a kanta so sakey a bii a “malimgas a singa say bulan.” (Kanta nen Solomon 6:10) Tan say impanawag na salmista ed bulan diad anlong to et “matoor a tasi ed tawen.” (Salmo 89:37) Anto ta so kabaliksan na satan a balikas nipaakar ed bulan?

Say bulan et ag-onsasaew a nasusumpal toy ililiber to ed dalin kada 27.3 ya agew. Kanian, say inkamatoor na bulan so nayarin ontutukoy ed inkanapanmatalkan to. Balet, nayarin wala ni mas aralem a kabaliksan a nononoten na salmista. Tinawag to so bulan a “matoor a tasi” diad mapropetikon kanta nipaakar ed Panarian ya imbangat nen Jesus ed saray patumbok to ya ipikasi.​—Mateo 6:9, 10.

Masulok a 3,000 taon la ed apalabas et akisipanan si Jehova a Dios ed ari na Israel nensaman a si David nipaakar ed Panarian. (2 Samuel 7:12-16) Say gagala na satan a sipanan et pian iletneg so legal a kanepegan na tomatawir nen David a si Jesu-Kristo, a manari lawas. (Isaias 9:7; Lucas 1:32, 33) Oniay inkanta na salmista nipaakar ed trono na “bini” nen David: “Sikato niletneg ya andi-angga a singa say bulan, tan singa matoor a tasi ed tawen.”​—Salmo 89:36, 37.

Say bulan a ‘silew ya uleyan to so labi’ so matukotukoy a panonot ed inkapermanente na uley nen Kristo. (Genesis 1:16) Tan nipaakar ed Panarian to et nabasa tayo ed Daniel 7:14 a “say panuley to sikato so lawas a panuley, a sikato so agnaani onlalabas, tan say panarian to ed satan sikato et agnabagbag.” Talagan say bulan et sakey a tasi a mangipapanonot ed sikatayo ed satan a Panarian pati saray bendisyon ya iter to ed totoo.

[Picture Credit Line ed pahina 32]

Bulan: NASA photo