‘Pinilit To Kamin’ Onla

SAY panagparawes so kaugalian la diad Mamabukig a daldalin. Singa bilang, diad India, anggano naerasan la so sakey a pamilya basta nasangkaili toy ag-inilaloan a bisita. Diad Iran met, kaslakan a kainaan so agmamapaandi na naakan diad refrigerator pian walay niparungo to no nabiglaan na saray sankaili.

Say ontan ya inkamabunlok a mangiter so sankaimano ed limog na dakel a totoo ya asalambit ed Biblia. Say sakey a matalonggaring ya alimbawa et si Lydia, a nayarin sakey a Judion proselita a manaayam ed Filipos, say manunan syudad na distritoy Macedonia. Aminsan diad agew na sabaton, abanaan nen apostol Pablo tan saray kakaiba ton ombiabiahe si Lydia tan arum nin bibii diad gilig na ilog ed paway na Filipos. Diad saman a bekta ya impansalita nen Pablo, nilukasan nen Jehova so puso nen Lydia. Bilang resulta, sikato so abautismoan pati saray kabiangay sankaabungan to. Insan impilit to ed saray ombiabiahe: “Diman ki la mipundod abung ko, no ipapasen yo ak a matoor ed Katawan.” Onia so insalaysay nen Lucas a kaiba nen Pablo: “Mapilit so impangimbita to, kanian linma kami.”​—Gawa 16:11-15, Maung a Balita.

Singa si Lydia, saray Kristiano met natan so mamaparawes ed saray kapananisiaan da, a singa saray ombiabiahen manangasikaso tan saray kaasawaan da. Sikaray ‘mapilit ya iimbitaan’ na saray managsankaili. Kanian, saramay mamaparawes so natutumangan met na makapabiskeg iran pantotongtong tan maespiritual a pantutuyaw. Anggaman kaslakan ed saray Tasi nen Jehova et aliwan mayaman, panggunaetan day ‘mamarawes.’ (Roma 12:13; Hebreos 13:2) Say inkamabulos dan mangiter so mamapaliket ed sikara. Petepeteg a duga si Jesus sanen inkuanton: “Lalo a mapalar so mangiter nen say mangawat.”​—Gawa 20:35.