Panon Mon Nibaga a Say Sakey et Maaligwas?

SI Jesse Livermore so kabkabat lapud makabat a panagdesisyon to nipaakar ed negosyo kanian sikato so ipapasen na arum bilang say sankaaligwasan lan negosyante. Bilang resulta, sikatoy akatipon na dakel a kayamanan. Sikatoy mansusulong na sankarakepan ya imparait ya amerikana, manaayam ed mansyon a walaay 29 a kuarto, tan walaan na mabmablin kotsin Rolls-Royce ya andeket tan wala ni dilin drayber to.

Si Davida so determinado met ya onaligwas. Bilang bise-presidente tan manedyer na sakey a baleg a kompanya, nayarin onatagey ni so posisyon to. Sikatoy asagyat na kayamanan tan inkabantog. Anggaman ontan, si David so personal a nandesisyon ya onekal la ed kompanya. “Amtak ya agak lan balot nawalaan na atagey a posisyon ed sekular a trabaho,” so inkuan nen David. Diad padesir mo, kasin alingo si David?

Panisiaan na dakel a totoo a say sakey so maaligwas no sikatoy mayamyaman, bantog, odino prominente. Balet nayarin nalilikna nin siansia na saramay maaligwas la ed materyal a walay kulang ed sikara tan andian na kabaliksan tan gagala so bilay da. Ontan so mapatnag a situasyon nen Mr. Livermore. Anggaman mayamyaman, say bilay to so napnoy pakadismayaan, trahedya, tan ermen. Asagmak toy depresyon, agmatalona iran panangasawa, tan ambetel a siglaotan ed saray ilalak to. Insan, sakey ya agew, sikatoy linma’d bar na sakey a marakdakep a hotel tan naney-eyan to iray naandi ed sikato. Kayari ton nan-order na alak, inala toy kuaderno to a naapisay katat, insan nansulat na panamatanir ed asawa to. Sanen naupot to la so iinumen to, sikatoy linmoob ed sakey a kuarton medyo ambilunget insan to pinaltog so inkasikato.

Anggaman komplikado iray sengegan na impanbikkel to, papaneknekan na sayan eksperiensya a tua so inkuan na Biblia: “Saray manpirawat ya onyaman . . . atalos ira na dakel a kaermenan.”​—1 Timoteo 6:9, 10.

Agkasi nalilingo iramay mangibabagan say tuan inkaaligwas et nibase ed kayamanan, posisyon, odino inkaprominente? Kasin ipapasen moy inkasika a maaligwas? Akin? Antoy basiyan mo pian nibagam ya ontan? Antoy mangiimpluensya ed panmoriam nipaakar ed inkaaligwas? Usisaen na ontumbok ya artikulo so epektibon simbawa ya akatulong ed minilyon pian nadampot so tuan inkaaligwas odino inkamatalona. Amtaen tayo no panon ka met a magmaliw a matalona.

[Paimano ed leksab]