Akin a Nepeg a Gawaen so Duga?

O NIAY inkuan nensaman na sakey ya edukadon laki: “Wala ed siak so panlabay, bangbalet say panggawa na kaabigan andi. Ta agko gawaen so kaabigan a labay ko komon: sabalet so mauges ya agko labay, sikatoya so gawaen ko.” Akin a nairapan iyan laki a gawaen so maabig a pirawat to? Oniay impaliwawa to: “Naromog ko sirin so ganggan, ta say mauges wala ed siak nen labay ko a gawaen so maong. Ta unong na too ed dalem ko, manliket ak ed ganggan na Dios: Bangbalet wala so nanengneng ko a sananey a ganggan ed saray kabiangan ko, a mibakal ya onsumpa ed ganggan na isip ko, tan arakep to ak ed ganggan na kasalanan a wala ed saray kabiangan ko.”—Roma 7:18, 19, 21-23.

Sarayan salita nen apostol Pablo, a nikurit ngalngalin 2,000 taon lay apalabas, so mangipaliwawa no akin a mairap parad saray ag-ayadyarin totoo a gawaen so duga. Nakaukolan so biskeg ed moral pian natumbok iray maptek a prinsipyo, nagkalalo la no nidunget ed makapasubok iran sirkumstansya. Kanian oniay nepeg tayon itepet, Anto so sankaimportantian a rason ed panggawa na duga?

Konsideraen pa so ibabaga na Kasulatan nipaakar ed arapen na sakey a toon maptek ed moral. Diad Salmo 37:37, 38, oniay nabasa tayo: “Tandaan mo so nagnap a too, tan nengneng mo so maptek; ta wala so maligan kasumpalan ed too na kareenan. Bangbalet saray manggawa na mauges nabagbag ira a mansasapon; say kasumpalan na bagel napater.” Oniay ibabaga ed sikatayo na Uliran 2:21, 22: “Say maptek manayam naani dia ed dalin, tan say ayadyari mansiansia naani ed sikato. Balet say marelmeng napegpeg a manlapu ed dalin, tan saray liputan nabagot ira ed sikato.”

Anggaman sarayan sipan tan arum nira a naromog ed Biblia so mamakiwas ed sikatayo pian gegemtanen so kurang a makapaliket ed Dios, aliwa iratan a manunan rason pian gawaen so ontan. Say rason et misiglaotan ed sakey ya isyu a mangilalanor ed amin ya intelihentin pinalsa bilang indibidual. Singbaten na onsublay ya artikulo no anto itan ya isyu tan no panon itayon nalalanor ed satan.