Panaglayag ed Maawang a Kadayatan
SAY Marshall Islands so tutugyopen na masulok a 1,200 ya isla tan angkekelag ya isla a maslak ed saratan et walaan na katagey ya ag-onkulang ed anemiran metro labat manlapud dantal na dayat. Agla iratan nabantag anggan diad asingger labat a distansia manlapud gilig na dayat. Ingen, saray marinon taga-Marshall Islands nensaman a linmugan ed saray baloton walaay kasig so akapanlayag na manga 2 milyon kilometro kuadrado, manlapud sakey a melag ya isla paonla ed melag ya isla ed Dayat na Pasipiko. Panon dan agawaan itan? Sikaray nigiya diad impangusar da na simpli, ingen ta epektibon tuloy “iran mapa” a tinawag a saray istik a tsart.
Diad panamegley na eksperiensya, naaralan na saray managlayag a taga-Marshall Islands a say kiwawala na dalin so mamapawala na saray galaw na daluyon a mangiparungtal ed kawalaan na sakey ya isla anggad 30 kilometro kaarawi. Dakdakel iran galaw na daluyon so aaralen, tan saray istik a tsart so kinmana pian natandaan iratan. Antoy itsura na saray istik a tsart? Singa nanengneng yo ed litrato, saray istik a nanlapud kinayasan iran lamot na pandanus odino saray tingting na niyog so impantatakeran pian mangirepresenta ed saray galaw na daluyon. Impeket iray angkekelag a seashell bilang panandaan ed relatibon distansia na kada isla.
Diad loob na dakel a taon, say panaglayag panamegley na istik a tsart so insekreto, tan imparungtal labat itan ed saray apili. Panon a say sakey a balo nin managlayag so makaaral a mangusar ed istik a tsart? Dia lambengat ed pangibangat tan pangipasal ed sikato. Say sakey ya eksperiensyado lan managlayag so personal a mangibangat ed balo nin marino, a nayarin itagar ton manlayag ed kabangibang iran isla. Sano naaralan la na man-aaprentis ya ibiig iray galaw na daluyon, sikatoy matalek met lan mangusar ed istik a tsart to. Agmanbayag et sikatoy makapanlayag lan bukor.
Diad mipadparan paraan, say Salita na Dios, say Biblia, so onkanan giya tayo ed pambiabiahe tayo’d bilay. Diad gapo, nayarin walay sakey ya ontulong ed sikatayo pian nagamoran so manunan pakatalos ed saray Kasulatan. Insan, legan tayon itutultuloy ya aaralen so Salita na Dios tan iyaaplika iray prinsipyo na satan, nawalaan tayoy talek ed ibabaga na satan. Si Josue, say lider na saray Israelita, so niganggan a basaen ton naynay so Salita na Dios ta pian ‘naimatonan to a gawaen so unong na amin a nisulat ed sikato.’ “Tan dia ed ontan,” kuan na Dios ed si Josue, “maong so pansumpalan mo.” (Josue 1:8) On, say Biblia so makapangigiya ed sikatayo dia ed segurado tan matalonan kurang na bilay.
[Picture Credit Line ed pahina 32]
© Greg Vaughn