“Manlapula’d Natan, Manisia Ak lan Wala so Dios”
SAKEY a biin Ukrainian a manngaray Alexandra, a manaayam ed Prague, Czech Republic, so pasempet la manlapud trabaho to. Diad gilig na karsada a tundaan na luluganan, walay naimano ton pitaka a nasisipsipa na saray ondadalan. Sanen dinokdok to itan tan nilukasan to, agto napanisiaan so anengneng to. Nankarga itan na kuartan papel a mankantidad na 5,000-koruna! Ompatnag ya anggapo ed kaliberliber to so manaanap ed satan a pitaka. Si Alexandra et naiirapan a mananap na pambilay lapud sikatoy sakey a dayo ed Czech Republic. Anto kasi so gawaen to?
Kasempet nen Alexandra, impanengneng to so pitaka ed anak ton bii, a si Victoria. Binukitkit da so pitaka ompan walay nanengneng dan ngaran tan address na akankayarian balet ta anggapo. Ingen, walay melag a papel ya akasukib ed pitaka ya akasulatan na pigaran numero. Akasulat ditan so sakey ya account number, tan diad pagpag et dakel niran numero. Akakarga met ed pitaka iray direksion a paarap ed sakey a lokal a bangko tan sakey a tseke ya asulatan na “330,000 koruny” (manga $10,000 U.S.). Ontan so eksakton kantidad na kuartan walad pitaka.
Nanggunaetan nen Alexandra a tawagan ed telepono so bangko, ya inusar to so ompatnag a dugan numero, balet ta sinmaew. Kanian linma ira a san-ina ed bangko pian ipaliwawa so agawa. Tinepet da so account number ya aromog da ed pitaka. Balet ta anggapoy ontan ed rekord na bangko. Diad tinmumbok ya agew, pinmawil si Alexandra ed bangko ya awit to so sakey nin numero a walad pitaka. On, say bangko so walaan na kustomer, sakey a bii, ya akankayarian ed saman ya account number. Kinontak di Alexandra tan Victoria so bii, tan sikaton talaga so abalangan. Sanen akapannengnengan la ra, say bii so akisalsalamat tan tinepetan to ra, “Anto so iter ko ed sikayo bilang kasalat na impangipawil yo na kuarta?”
Si Victoria so inmebat: “Anggapoy kasalat. No talagan naninteresan mi so kuarta, inala mi la komon itan.” Diad daiset ya amta ton salitan Czech, oniay impaliwawa to: “Ipapawil mi ed sikayo so kuarta yo lapud Tasi nen Jehova kami. Ag-iyabuloy na konsiensia min nipasal ed Biblia ya alaen so agmi kayarian.” (Hebreos 13:18) Say bii so malikeliket ya angibagan “Manlapu la’d natan, manisia ak lan wala so Dios.”