“Saya la so Naisip Kon Sankaabigan ya Impakasumpal”

ONIAY insulat na sakey a maestro na haiskul diad España: “Diad loob na masulok a sanlasus taon, impatnag la na saray Tasi nen Jehova so tuan inkasaksakey, agnabalaw ya inkamatua, tan manuna ed amin, say agnabuyak a pananisia ra.” Anto so amakiwas ed sayan maestro—a sakey a mankuan ya ateista—pian mangibalikas na ontan?

Ginmapo itan sanen si Noemi, sakey ya estudyante ed haiskul tan sakey a Tasi nen Jehova, so apabtangan a mangisulat na essay bilang kabiangan na sampot lan eksamin to diad saray aaralen to ed haiskul. Denesidi ton isulat so teman “Saray Purpuran Trianggulo Diad Uley na Nazi.”

Akin a satan a tema so pinili to? Oniay insalaysay nen Noemi: “Lapud sakey a maestro so mannengneng ed isulat ko, inisip ko a nayarian kon anamoten iyan pankanawnawa a manpulong ed sikato. Atenyeg so pusok ed say istorya na impanmatoor na saray Tasi nen Jehova diad Nazi Alemanya. Segurado ak a pandinayewan met itan na arum.”

Say insulat nen Noemi so awalaan na baleg ya epekto ed dakel nin totoo nen say posiblin naisip to. Nen Oktubre 5, 2002, say essay to so akaawat na premyo diad pakontis ed interon bansa nipaakar ed panagsukimat ed siensia tan panagaral nipaakar ed totoo. Saray premyo ed satan a pakontis so inyawat na sakey a hurado a tugyopen na 20 ya iskolar tan propesor a nanlapud bantog iran unibersidad ed España.

Inawat nen Noemi so premyo to manlapud si Pilar del Castillo, say Kastilan ministro na edukasyon. Inanamot nen Noemi so pankanawnawan ikdan so ministro na sakey a kopya na video a Jehovah’s Witnesses Stand Firm Against Nazi Assault. Satan a regalo so maliket ya inawat na ministro.

Diad Manresa, a baley nen Noemi, impabitar na lokal a peryodiko so maong ya agawaan to ed akademiko tan nirepaso to so lugan na essay nen Noemi. Kaleganan na satan, say prinsipal ed eskuelaan so kinmerew na kopya na insulat nen Noemi ta pian nilaktip to itan ed programan panselebra ed koma-75 ya anibersaryo na haiskul.

“Saya la so naisip kon sankaabigan ya impansumpal ed saray asignaturak ed haiskul,” so inkuan nen Noemi. “Malikeliket ak sanen abasak iray insulat na maestrok, a si Mr. Jorge Tomás Calot, bilang kabiangan na introduksion to ed report ko:

“‘Sakey ak ya ateista, balet labay kon nakombinse ak a maong ed kiwawala na sayan Supremon Persona, a mangisasagyat ed saray mandadayew ed sikato na sankapuroan ya “aro ed kaparan too.”’”