“Say Mamaparakep ed Interon Galilea”

MANGA anemira tan kapalduan kilometro manlapud amianen-sagur na Nazaret, say baley a binalegan nen Jesus, naromog so syudad ya agbalot asalambit ed saray Ebanghelyo. Ingen, binidbir itan na bantog a Judion historyador nen inmunan siglo a si Flavius Josephus bilang “say mamaparakep ed interon Galilea.” Satan a syudad et say Sepphoris. Anto so amta tayo nipaakar ed sayan syudad?

Kayari na impatey nen Herodes a Baleg, a maseguro nen 1 K.K.P., saray mibabaley na Sepphoris so nanrebelde ed Roma, a nansumpal ed inkaderal na syudad da. Tinawir na anak nen Herodes a si Antipas so Galilea tan Perea, insan pinili to so aderal a Sepphoris a pangipasenan na balon kabisera to. Say syudad so impaalagey lamet a walaan na Griego-Romanon estilo na arkitektura, balet ta say karaklan a populasyon ditan et Judio. Unong ed si Propesor Richard A. Batey, nagmaliw itan a “pinagkasentro na gobierno pian nauleyan so Galilea tan Perea,” ya anggad impaalagey nen Antipas so Tiberias nen ngalngali 21 K.P. pian salatan so Sepphoris bilang kabisera. Saya imay panaon sanen nanayam si Jesus diad asingger na satan a syudad.

Panisiaan nen Propesor James Strange, a nankotkot diad Sepphoris, a say syudad et datin walaan na saray simpenay-dokumento, sakey a simpenay-kayamanan, sakey a simpenay-armas, saray banko, bilding a pampubliko, tan saray tindaan na seramika, salming, kagawaan a metal, alahas, tan nanduruman tagano. Wadtan met iray managlaga tan managlako na abel, ontan met iray lakoan na baskit, muebles, pabalingit, tan arum niran produkto. Akalkula a say populasyon ed saman a panaon et manlapud 8,000 ya anggad 12,000.

Kasin dinalaw nen Jesus iyan okupadon syudad, a sakey oras ya akaren manlapud Nazaret? Saray Ebanghelyo so agmangiiter na ebat ed sikatayo. Balet, inkuan na The Anchor Bible Dictionary a “say sakey a lohikal a rota manlapud Nazaret a paarap ed Cana na Galilea et ondalan ed Sepphoris.” (Juan 2:1; 4:46) Manlapud Nazaret et nanengneng so pukdol na Sepphoris, a manga 120 a metro a kaatagey manlapud sankaabebaan a lawak. Panisiaan na arum a sanen angiter na ilustrasyon si Jesus a “say sakey a syudad a nipasen ed tapew na sakey a pukdol agnayarin yamot,” nayarin sayan syudad so walad kanonotan to.—Mateo 5:14.

Kayari na inkaderal na Jerusalem nen 70 K.P., say Sepphoris so nagmaliw ya importantin syudad na saray Judio diad Galilea tan diad saginonor et ditan so angiletnegan ed Sanhedrin, say atagey a korte na saray Judio. Walay panaon ya inmaligwas itan bilang say sentro na edukasyon na saray Judio.

[Mapa/Litrato ed pahina 32]

(Parad aktual a format, nengnengen so publikasyon)

Dayat na Galilea

GALILEA

Cana

Tiberias

SEPPHORIS

Nazaret

PEREA

[Picture Credit Line ed pahina 32]

Saray buyog: Akotkot na Wohl Archaeological Museum, Herodian Quarter, Jewish Quarter. Kayarian na Company for the Reconstruction of the Jewish Quarter in the Old City of Jerusalem, Ltd