Sabien so Puso na Ugaw

KASIN naeermenan kayo sano makakanengneng kayo na sakey ya ugaw a manggagalaw na pampapaltogan? Saratan so kaslakan lan nanenengneng anggan diad limog na saray ugugaw ni, lapud pirmi la so karawalan ed lawak na panliliket. Panon yon natulongan so sakey ya ugaw pian nawalaan na interes ed panggalaw na nipaakar ed deen imbes a panlalaban? Si Waltraud, ya abayag lan misionaryo na saray Tasi nen Jehova ed Aprika, so akatulong ed sakey ya ugaw pian gawaen so ontan.

Lapud walay pambabakal ed bansan panaayaman nen Waltraud, kinaukolan to so ontaynan tan manayam ed sananey a bansa ed Aprika. Ditan et iyaaralan to na Biblia so sakey ya ina a walaan na limay-taon ya anak a laki. Kapag no dadalawen to so ina, samay anak so manggagalaw na melag a palpaltog, say alenleneg a galawgalaw to. Agnin balot anengneng nen Waltraud ya impatuyong na ugaw itan a palpaltog, balet lanang ton lulukasan tan isasara itan, a singa to kakargaan na bala.

Oniay inkuan nen Waltraud ed ugaw: “Werner, amtam no akin a manaayam ak diad bansa yo? Lapud wala so guerra ed bansa mi, kinaukolan ko so ontaynan pian napaliisan iray makapataktakot a lalaki a manpapaltog ed totoo a manguusar ed singa sata’y sankabembenan mo. Maong kasi so pampapaltogan?”

“Andi,” so maermen ya inyebat nen Werner.

“Duga ka,” so inkuan nen Waltraud. Insan to tinepetan: “Amtam no akin a sinimban ondadalaw ak ed sikayo nen nanay mo? Lapud labay mi ran Tasi nen Jehova a tulongan so arum a makapikareenan ed Dios tan ed kapara min totoo.” Diad panangiyabuloy na ina nen Werner, oniay imbaga ed sikato nen Waltraud: “No iter mo’d siak itay palpaltog mo, satan so ibantak ko, balet ipromisak ed sika ya ikdan ta ka na galaw-galaw a trak ya apatiray dalig.”

Inyawat ed sikato nen Werner so palpaltog to. Balet nanalagar ni na apatiran simba insan naawat to so balon galawgalaw to​—sakey a trak a gawa ed kiew, a panliketan ton maong.

Kasin ipapanaon yoy pitongtong ed ananak yo, a panggugunaetan yon sabien so puso ra ta pian napakiwas iran mangibantak ed saray galawgalaw a mipadpara ed saray armas ya uusaren ed bakal? No ontan, nibangat yo ed sikara so sakey a leksion a mangunggona ed sikara legay bilay da.