Sakey ya Imbitasyon . . .

Kasin Siansia Nin Say Dios so Mangokontrol?

WALARAY kalamidad, makapatey iran sakit, panagkurakot na saray walad pakauley, panangataki na terorista, bakabakal, tan krimen. Inagew-agew tayo lawarin narerengelan so ontan iran balita. Balanglan apektado ka ed saratan odino andi, seguradon panuumamengan mo no iner lay aarapen na sayan mundo tan no kasin ondakep ni so kipapasen na mundo.

Pian naebatan iratan, iparungtal na saray Tasi nen Jehova ed masulok a 200 a nasyon ed interon mundo so nipanpanaon a publikon paliwawa ya apauloan na “Kasin Siansia Nin say Dios so Mangokontrol?” Singbaten ditan no antoy ibabaga tan isisipan na Dios diad andiay-lingon Salita to, say Biblia, nipaakar ed sarayan importantin tepet:

Kasin interesado so Dios ed saray pakurang na dalin?

Anto so liknaan to nipaakar ed katooan?

Kasin sikatoy interesado ed pankaabigan mo?

Diad dakel a lugar et nagawa so paliwawa ed Simba, Abril 30, 2006, diad Kingdom Hall na Saray Tasi nen Jehova. Saray Tasi ed lugar yo so maliket a mangibaga ed sika no kapigan tan iner itan nagawa.

Sika so imbitado ed sayan libre tan makapaseseg a paliwawan nibase’d-Biblia a mangiter ed sika na makapenek ya ebat ed tepet a: Kasin Siansia Nin say Dios so Mangokontrol?