Inusil-usilan Diad Gapo, Insan Kinaaro

PIGARAN taon ed apalabas, say sanasawan Santiago tan Lourdes so inmalis ed marakdakep a baley na Huillcapata, Peru, pian inabang ed saray taga-diman so mensahe na Biblia a mangitatarya na ilalo. Balet, agnambayag et sinmabi ed saman a baley so sakey a pari a nanlapud Cuzco tan pinandaragup to iray residente na baley. Sikara so pinasakbayan to a say kiwawala na saray Tasi nen Jehova ed lugar da et pansengegan na ilesa na makapatey a sakit tan iyuran na yelo a mamatey ed saray ayep da tan maneral ed saray tanem da.

Dakel so naimpluensyaan ed sayan “propesiya,” kanian masulok a sakey tan kapalduan taon ya anggapoy angawat ed panangiyaral na Biblia ya iyoopresi nen Santiago tan Lourdes. Sikara so inusil-usilan na sakey ya opisyal na baley a manngaran na Miguel, say tenyenti gobernador, tan tinutupak to ira na bato. Balet ta sikara so lawas mareen tan onkikiwas bilang Kristiano.

Asabi panaon et wala met la iray pigaran taga-diman ya impaiyaralan na Biblia. Anggan si Miguel et anguman met la ed awawey to. Sikatoy impaiyaralan la ed si Santiago, agla manbuabuanges, tan nagmaliw lan mareen a too. Diad kaunoran, say asawa nen Miguel tan duara ed ananak ton bibii so angawat ed katuaan na Biblia.

Natan et wala lay maaligwas a kongregasyon na saray Tasi nen Jehova ed sayan baley. Maliket si Miguel ta amintis so maslak ed saray baton intupak to ed kinen Santiago tan Lourdes, tan pisalsalamatan to so maabig ya ehemplo na sanasawa lapud mareen ya awawey da.

[Saray litrato ed pahina 32]

Nauman so awawey nen Miguel (kawanan) lapud mareen ya awawey di Santiago tan Lourdes (tagey)