Kasin Nanonotan Yo?

Naapresya yo ta’n binasa so agano niran paway na Say Panag-Bantayan? Salien yo pan ebatan so onggendan iran tepet:

• Akin a say primeron kasalanan​—say intunganga nen Adan​—so niyaliling ed atawir a sakit?

Singa itan sakit lapud niyalis nen Adan so kasalanan ed ilalak to. Kanian atawir tayo so depekto na kasalanan, no panon a natawir na arum ya ananak so sakit manlapud atateng da.​—8/15, pahina 5.

• Antoray manunan sengegan na ondaraak a karawalan natan?

Panggugunaetan nen Satanas ya iyarawi itayo manlapud si Jehova diad pangipapaslep to na marawal ya espiritu diad kapusoan tayo, a singa diad panamegley na saray pelikula, musika, tan say computer games a manasagyat ed saray manggagalaw ya aligen so inkaruksa tan panagpatey. Say karawalan a nipaparungtal ed media so sakey a sengegan na dakel a gawa na karawalan.​—9/1, pahina 29.

• Siopa si Poncio Pilato?

Sikato so sakey a Romano ya agtanton mayaman, a datin kabiangan na militar. Tinuro nen Romanon Emperador Tiberius si Pilato bilang gobernador na probinsya na Judea nen 26 K.P. Diad impan-usay ed si Jesus, nadngel nen Pilato iray akusasyon na saray Judion papangulo. Pian pagustoan so karaklan, inabobonan to so pamatey ed si Jesus.​—9/15, pahina 10-12.

• Anto so “tanda” ya asaglawi ed Mateo 24:3?

Sayan tanda so tugyopen na pigaran kabiangan, a manibukel ed tugyop a pakabidbiran, odino sinyalis. Lalaktipen na tanda so bakal, eras, salot, tan saray yegyeg, tan ontulong iratan ed saray patumbok nen Jesus pian naamtaan da so ‘kiwawala’ to ontan met ed “kasampotan na sistema na bengabengatla.”​—10/1, pahina 4-5.

• Anto so Diaspora, tan antoran lugar so nalalanor?

Onaaplika so termino ed saray Judio a manaayam ed paway na Palestina. Nen inmunan siglo, saray lugar a kawalaan na dakdakel a Judio et diad Sirya, Asia Minor, Babilonia, tan Ehipto, tan walaray angkekelag a komunidad diad Europa a kabiangan na Empiryo na Roma.​—10/15, pahina 12.

• Napansiansia kasi na sakey a Kristiano so maong a konsiensia to no awaten to so trabahon walay bebembenan ya armas?

Personal a desisyon so iloob ed sekular a trabahon nakaukolan so pambemben na paltog odino arum ya armas. Balet, say trabahon walay bebembenan ya armas so mangipaarap ed sakey diad posiblin pankasalanan ed dala no usaren to la itan tan sikato met so nipaarap diad kapeligroan na pakarisgo odino ipatey lapud iyataki odino ibawi na arum. Say sakey a Kristianon mamebemben na ontan ya armas so ag-onkualipika ed antokaman iran nikabiig a pribilehyo diad loob na kongregasyon. (1 Timoteo 3:3, 10)​—11/1, pahina 31.

• Lapud say salitan “Armagedon” so inaon ed balikas a “Palandey na Megiddo,” kasin nagawa itan a pambabakal ed Armagedon diad sakey a palandey ed Pegley Bukig?

Andi. Anggapon talaga so Palandey na Megiddo, noagta sakey labat itan a pukdol a walad abay na lawak a patar diad Israel. Ag-onsusto ed satan a lugar so amin ya “arari ed dalin, tan saray ehersito [odino armada] da.” Say baleg a bakal na Dios so nagawa ed interon dalin, tan panganggaen na satan so amin a bakal. (Apocalipsis 16:14, 16; 19:19; Salmo 46:8, 9)​—12/1, pahina 4-7.