Panaon na Krismas tan Balon Taon—Kasin Pepeneken na Saratan so Amin ya Iilaloan Yo?
“Ingganggan nen Pedro [a Baleg] a gawaen ed amin a simbaan iray espisyal a misa parad Balon Taon diad Enero 1. Ingganggan to met ya usaren iray sanga na kiew ya evergreen a pandekorasyon ed hamba na saray puerta ed loob na kaabungan, tan say amin a taga-Moscow et nepeg a ‘mangipatnag ed liket da panamegley na maksil a pambabanoan da’ diad Balon Taon.”—Peter the Great—His Life and World.
ANTO so iilaloan yo diad panaon na Krismas tan Balon Taon? Satan so andukey a panaon na bakasyon. Nayarin bakasyon na saray atateng tan ugugaw legan na satan, kanian ompatnag a sankaabigan itan a panaon pian makapaniiba iray pamilya. Say Krismas et tradisyonal ya agew na inkianak nen Kristo. Arum a totoo so manpipirawat a pagalangan si Kristo legan na sayan panaon ed taon lapud moriaen dan saya so sankaimportantian ya aspekto na okasyon. Nayarin ontan met so panmoria yo.
Balanglan panaon itan parad pangigalang ed si Kristo, maliket a pakapilimog na sakey ed pamilya to, odino parehon ontan, minilyon a kaasawaan a lalaki tan bibii tan ananak ed sankamundoan so magunaet a mantatalaran ed sayan panaon. Komusta kasi ed sayan taon? Kasin magmaliw itan ya espisyal a panaon parad pamilya, tan kasin espisyal itan parad Dios? No wala man so panduroypo na pamilya, kasin peneken na satan so amin ya iilaloan yo, odino nadismaya kayo?
Naiimano na dakel a totoo a maniilalo ed relihyoson aspekto na Pasko tan Balon Taon a saratan so mabetbet a seselebraan ya anggapoy pisiglaotan ed si Kristo. Imbes, saratan so magmamaliw labat lan panaon pian makaawat na saray regalo, baraan pian makapanliliket a pakapatnagan ed kondukta ya agmamapagalang ed Kristo, odino manunan rason iratan pian manduroypo so pamilya. Mabetbet a say ontan a panduroypo et dederalen na sakey odino arum niran membro na pamilya a sobran manaakan tan maniinuman na alak, a pansesengegan na saray sangsangan a naynay lan manreresulta ed karawalan ed ayaman. Nayarin ontan so naiimatonan yo, odino naeksperiensya yo ni ingen lan mismo.
No ontan, nayarin nibaga yo ya anggapoy tanton angumanan manlapu la’d panaon na Ari na Russia a si Pedro a Baleg, ya adeskribe diad gapo. Lapud nawewetwet so dakel a totoo ed kaplesan a nagagawa, pirawat da a say panaon na Krismas tan Balon Taon et magmaliw komon a panaon parad masimoon a relihyoson panagdalepdep tan maliket a panlilimog na pamilya. Wala ni ra ingen so mankakampanya parad pananguman, ya uusaren da iray diparan a, Si Jesus so rason parad sayan panaon. Balet kasin nagawaan itan a pananguman? Tan peteg kasin mangigalang itan ed si Kristo? Kasin wala iray rason pian moriaen itan a panaon diad duman punto de bista?
Pian naromog so makapenek iran ebat, konsideraen tayo so kipapasen unong ed panmoria na totoo ed sakey a bansa a walaan na nikaduman rason pian nipatnag day panamabli ra ed sayan panaon ed taon.