Inanabang Da so Maong a Balita ed Saray Telek

“IYAAKARAN da kayo na espiritual iran bengatla!” Ontan so agano nin impaneskribe na direktor na sakey ya ayaman na saray senior citizen diad Navalcarnero, Madrid, España, nipaakar ed ibibisita na saray Tasi nen Jehova diad satan ya ayaman. Anto so amakiwas ed sikato pian ibalikas so ontan?

Diad sakey ya ayaman a tatawagey Rosas del Camino et walaray residente a telek. Balet, lapud nansagpot iray Tasi a manaral na Spanish Sign Language, makapitalosan ira ed saratan a residente. Indayew na direktor iray Tasi lapud libren pangiyoopresi ra ed panaon da pian ibangat so espiritual iran pamaakaran ed saramay mankaukolan na saratan. Naimano to so maabig ya epekto na pangibabangat da na maong a balita na Panarian ed saray residente. Tan sarayan residente​—nagkalalo la iramay walaan na deperensya ed pakadngel tan pakanengneng​—so mamapabli met a tuloy ed ibibisita na saray Tasi.

Si Eulogio, a sakey ed saray residente a bulag tan telek, so iyaaralan la natan na saray Tasi nen Jehova. Sakey ya agew legan iran manaaral, walay masiken ya inmasingger tan inikdan to imay Tasi na sakey ya anlong ya insulat na saray residente bilang panangipatnag na pisasalamat da. Say anlong so apauloan na “Say Pagmaliw a Tasi.” Oniay nabasan kabiangan na satan: “Say bilay da makabkabaliksan tan walaay kasimpitan, Makapaliket a kakabatan da, si Jehova so lapuan. Diad kabkaabungan, naynay iran wadman, lapud si Jehova so lawas dan panmamatalkan.”

Sayan mismo a panagmatalek ed si Jehova so mamapakiwas ed saray Tasi ed interon mundo pian manaral na sign language ya uusaren na saray telek diad bansa ra. Diad onian paraan et ninanabang da ed saratan a sinansakey so makapaseseg a katuaan a naromog diad Biblia.