No Panon Tayon Nakontrol so Emosyon Tayo

KASIN nadadaeg kayo no maminsan na negatibon emosyon yo? Kasin magmainomay kayon onsyodot, onsanok, odino nadismaya? Kasin no maminsan et masyadoy pakaaapektoan yo ed saray pakakaaburidoan ed bilay? Anto so makatulong?

Saray emosyonal a reaksion et parte na bilay na too. Sano dugay pakakontrol ed saratan, pagmaliwen dan lalon makapainteres so bilay. Balet, aaksobien na Biblia a say “panpalalo [odino puros a kairapan et] gawaen to so makabat a too a maatiw.” (Eclesiastes 7:7) Diad mundon kasmak so karawalan tan aksidente, siopay agnaapektoan na saray nagagawa ed kaliberliber? Anggaman ontan, inkuan met na Kasulatan ya: “Anggapo so bengatla a magmaong nen say panliket na too ed saray gawa to.” (Eclesiastes 3:22) Pian lalon makapaliket so bilay, kaukolan tayo sirin ya aralen so panliket diad pamayubo ed positibo iran emosyon. Panon tayon nabayuboan so makagunggona iran emosyon tan napokpokan iramay makaderal?

Mabetbet a say panggawa na praktikal iran kundang so mamakepa ed negatibo iran emosyon tayo. Alimbawa, sano panaaburidoan tayo iray bengatlan agtayo met lanlamang nakontrol, agta mas maabig no umanen tayo so rotina tayo odino onla’d sananey a pasen imbes a naynay lan manaburido? Say panakar, idengel ed makarelaks a musika, pan-ehersisyo, odino say panulong ed sakey a mankaukolan so nayarin pakainawaan tayo odino anggan panon et pakaliketan tayo.​—Gawa 20:35.

Balet, say sankaabigan a paraan pian niwaklit so negatibon kanonotan et say panmatalek tayo ed Manamalsa. Sano siansia ni so negatibon kanonotan, kaukolan tayon ‘imatalek ed Dios so amin a kapagaan tayo’ panamegley na pikakasi. (1 Pedro 5:6, 7) Papaseguroan itayo na Biblia a: “Si Jehova asingger ed saray wala ed kipapasen na sakey a nabtagan na puso . . . Amayamay so pakapaermenan na matunong: balet si Jehova iliktar to ya ipaway ed saraya ya amin.” (Salmo 34:18, 19) Panon itayon makapanmatalek a say Dios et ‘tulong tan Manangiliktar tayo’? (Salmo 40:17) Nagawaan tayo iya diad panaral ed Biblia tan pandalepdep ed saray alimbawa a tudtuan agawa a mangipapanengneng ya interesado so Dios ed pankaabigan na saray lingkor to.