Sakey a Mapaabeban Aprikano ya Angaro ed Salitay Dios
MABETBET a nikekelawan iray ompapasyar ed Aprika lapud main-inomay so pakapitongtong ed saray totoo ditan nipaakar ed saray tema na Biblia. Saray tepet a singa say, “Anto so Panarian na Dios?” odino “Wala kasi so magnayon a solusyon ed saray probleman singa say kakulangay tagano, sakit, bakal, tan krimen?” so mainomay a managyat ed saray totoo pian ondengel. Dakel so maliket a mangiyabuloy ed sakey a dayo a mangipanengneng ed sikara na saray ebat manlapud Biblia. Saya so mabetbet a manresulta ed regular a panangiyaral na Biblia. Tan sano onaaligwas la ed espiritual iray iyaaralan, sikaray magmaliw a bautismadon Kristiano.
Sakey ed saray sankaunaan ya Aprikano a kinmiwas ed ontan a paraan et asalambit ed Biblia diad Gawa 8:26-40, unong ed Maung a Balita. Sikato so sakey ya Etiopen laki a linma ed Jerusalem pian mandayew ed tuan Dios a si Jehova.
Singa ipapanengneng na litrato ed leksab, say Etiope so mamabasa na sakey a lukot legan ya akalugan ed karwahe to bangta pasempet la. Walay sakey a dayo ya inmasingger ed sikato tan nantepet: “Natatalosan mo tay babasaen mo?” Mapaabeban inaksobi na Etiope a nakaukolan to so tulong tan pinalugan to ed karwahe to imay dayo, say Kristianon ebanghelisador a si Felipe. Insan to impaipaliwawa ed si Felipe so kabaliksan na kapkapambasa ton kabiangay Kasulatan. Impaliwawa nen Felipe a satan so propesiya a manutukoy ed agano nin impatey na Mesias, si Jesu-Kristo. Indalatdat met nen Felipe so arum niran bengatla nipaakar ed “maong a balitan nipaakar ed kinen Jesus,” a seguradon pati say inkioli to.
Diad impakadngel na Etiope ed sarayan makapakelaw a katuaan, labay to lay magmaliw a babangatan nen Jesus tan intepet to: “Anto ni makasbel ed pampabinyag ko?” Kayari na inkabautismoan to, sayan mapaabeban Aprikano so malikeliket a sinmempet tan anggapo lay arum nin sinaglawi na Biblia nipaakar ed sikato.
Natan, saray Tasi nen Jehova so ontutulong ed minilyon a totoo ed interon mundo pian makaaral ed satan met a ‘maong a balita.’ Diad kaplesan et ngalngali anemiran milyon a libren panangiyaral na Biblia so nikokondukta.