‘Singa Sakey a Mablin Bato ya Ambalanga’

AKANENGNENG si apostol Juan na sakey a pasingawey na maglorian trono ed tawen. Samay Sakey ya akayurong ed trono et “singa baton jaspe.” Sikato met so singa “sakey a mablin bato ya ambalanga.” (Apocalipsis 4:2, 3, NW) Anton klase irayan bato?

Aliwa irayan bato ya ompuktal so liwawa tan onkirlap ed tapew na saratan. Nensaman a panaon, say Griegon salitan nipatalos a “jaspe” so inusar pian tukoyen iray bato ed nanduruman kolor, pati saray ankablin bato a mankaninag. Say “baton jaspe” ed Apocalipsis 4:3 et “segurado ya aliwan say mamuran baton jaspe natan,” so inkuan nen A. T. Robertson ed Word Pictures in the New Testament. Sakey ni, diad bandad unor na libron Apocalipsis, deneskribe nen Juan so mangatatawen a syudad, say Jerusalem, a kuanto: “Say liwawa to singa sakey a bato a sankablian, singa bato a jaspe, a mankirlap a singa kristal.” (Apocalipsis 21:10, 11) Saray bato a tinukoy nen Juan et mapatnag a mankaninag, ya ontalos ed saratan so liwawa.

Samay sakey a nirepresenta bilang akayurong ed trono ed pasingawey nen Juan et say sankagloriaan a Persona ed uniberso, si Jehova a Dios. Sikatoy sankapuroan tan sankasantosan. Mitunosan ed satan, onia so insulat nen apostol Juan: “Say Dios so silew, tan dia ed sikato anggapon balot so kabilungtan.” (1 Juan 1:5) Kanian, pinaseseg nen Juan iray kapara ton mananisia a ‘linisan da so inkasikara unong a sikato [si Jehova] et malinis.’​—1 Juan 3:3.

Antoy nepeg tayon gawaen pian moriaen itayo na Dios bilang malinis? Sigpot a makanakana so pananisia tayo ed nipaagus a dala nen Kristo parad kaperdona na saray kasalanan tayo. Nepeg itayo met a mantultuloy a “manakar ed silew” diad regular a panaral tayo ed Biblia tan pambilay a mitunosan ed saray bangat na satan.​—1 Juan 1:7.