No Antoy Kabaliksan ed Sikatayo na Kapaabebaan nen Jehova
SI David et sakey a toon akasagmak na kairapan. Sikatoy minaltrato na maimon a katulangan ton si Arin Saul. Amitlon ginetma nen Saul a pateyen si David panamegley na gayang tan diad loob na pigaran taon et agtinmundan mamupunting ed sikato, kanian sikatoy apaskar a magmaliw a takas. (1 Samuel 18:11; 19:10; 26:20) Ingen, ag-inkaindan nen Jehova si David. Sikato so inliktar nen Jehova manlapud si Saul tan ed arum niran kakabusol to. Kanian, natalosan tayo sirin so liknaan nen David sanen inkanta ton: “Si Jehova sikato so dampay ko, tan pakdaal ko, tan Manangilegyas ko. . . . Iter mo [Jehova] ed siak met so kinlong na panangilaban mo, et say kauyamoan [odino kapaabebaan] mo ginawa to ak a baleg.” (2 Samuel 22:2, 36) Agamoran nen David so inkatalonggaring ed Israel. Panon sirin a nalalanor so kapaabebaan nen Jehova?
Sano ibabaga na Kasulatan a mapaabeba si Jehova, aglabay ya ibaga na satan a walay limitasyon to odino sikato so walad pakayari na arum. Imbes, ipapatnag na sayan makaroyroyon kalidad ya aralem so panangabagey to ed saray totoon manggugunaet a makagamor na panangabobon to tan sirin et sikaray kakasian to. Oniay nabasa tayo ed Salmo 113:6, 7: “[Si Jehova] so mampaabeba ya onnengneng ed saray bengabengatla ed tawen, tan dia ed dalin . . . ipaalagey to so duka ya agwaten ed dabok.” Say ‘pampapaabeba’ to et mankabaliksan a sikatoy “onuusdong.” (Maung a Balita) Kanian manlapud tawen et si Jehova a mismo so ‘inmusdong’ odino ‘nampaabeba,’ pian talinengen si David, sakey ya ag-ayadyari balet ta mapaabeban too a nampilalek a manlingkor ed Dios. Kanian, oniay impaseguro nen David ed sikatayo: “Anggan si Jehova et atagey wala so panangimano to ed makabos [odino mapaabeban too].” (Salmo 138:6) Say mapangasi, maanos, tan maabagey ya impideneng nen Jehova ed si David so nepeg a mamaseseg ed amin a manggugunaet a manggawa ed linawa na Dios.
Anggaman si Jehova so walad sankatagyan a posisyon bilang Soberano ed uniberso, sikatoy mabulbulos a midedeneng ed balang sakey ed sikatayo. Lapud saya et makapanmatalek itayo ya ag-onsaew so tulong to anggan diad sankairapan iran kipapasen. Anggapoy rason tayo pian ontakot ya ompan lingwanan to itayo. No nipaakar ed totoo to ed kadaanan ya Israel, si Jehova so matukotukoy a nibagan say sakey a ‘nannodnonot ed sikara ed kaabebaan na kipapasen da: ta say panangasi to manando lawas.’—Salmo 136:23.
Bilang saray lingkor nen Jehova natan, nayarin makasagmak itayo met na kairapan a singa si David. Nayarin balbalawen itayo na saramay agmikabat ed Dios, odino nayarin mipupuligesgesan itayo ed mabeblay a bunigas odino inateyan itayo. Antokaman so kipapasen tayo, no masimoon so puso tayo, makaasingger itayo ed si Jehova diad pikakasi, ya onkerew na panangasi to. Si Jehova so ‘onusdong’ pian imanoen to itayo tan dengelen iray pikakasi tayo. Oniay insulat na pinuyanan a salmista: “Saray mata nen Jehova wala ra ed matunong a too, tan saray layag to akalukas ira ed saray akis da.” (Salmo 34:15) Agkasi natenyeg so liknaan mo no nodnonoten mo iyan makapasagyat a kalidad nen Jehova a kapaabebaan?
[Saray litrato ed pahina 30]
No panon a dinengel nen Jehova iray pikakasi nen David, mabulbulos a dengelen to met iray pikakasi tayo natan