Say Panaanap na Mas Dakel ni

“No ag-itayon balot mankontento, ag-itayo napenek anggan kapigan.”​—Inreport na Worldwatch Institute.

“ANTO so kaliktan tayo? Amin. Kapigan tayo nakaukolan itan? Natan la.” Sayan diparan so popular ed pigaran estudyante ed kolehyo legan na dekada na 1960. Diad kaplesan et nayarin agla narerengelan irayan eksakton salita, balet mansiasiansia so manunan ideya na satan. On, say panaanap na mas dakel ni so ompapatnag a manuna lan pakabidbiran ed panaon tayo.

Parad karaklan, sankaimportantian ed bilay so pakagamor na kayamanan tan kaykayarian. Oniay aminsan ya inkuan na datin Presidente na E.U. a si Jimmy Carter: “Natan et agla bibidbiren so sakey a too unong ed nagagawaan to noagta unong ed saray kayarian to.” Kasin wala niray mas importantin bengatla nen say kaykayarian? No wala ni, anto kasi iratan, tan antoray nagunggona tayo ed saratan?