Wala Kasi so Nagawaan na Saray Pikakasim?

SIOPA ed sikatayo so agni nidunget ed seryoson kipapasen ya agtayo la amtay gawaen tayo? Ipapabitar na Biblia a kabat nen apostol Pablo a nauman na pikakasi so pansumpalan na saratan a seryoson kipapasen.

Sanen agmakatunongan a nipriso si Pablo ed Roma, kinerew to ed saray kapara ton mananisia a sikatoy ipikasi ra, insan oniay inyarum to: “Kerewen ko ed sikayo a mapilpilit a gawaen yo so saya, pian siak so nipawil ed sikayo ed maganggano.” (Hebreos 13:18, 19) Diad sananey nin inkagawa, impatnag nen Pablo so talek to ya onkiwas so Dios ed saray pikakasi parad maganon kibulos to. (Filemon 22) Agnambayag et nibulos si Pablo insan intuloy to lamet so impanmisionaryo to.

Balet peteg kasin nauman na pikakasi so pansumpalan na saray problemam? Nayari. Nonoten balet a say pikakasi so aliwa labat a sakey a pormal a relihyoson agamil. Saya so aktual a pitatalosan ed maaro tan makapanyarin Ama tayo a walad katawenan. Nepeg ya espisipiko itayon tuloy ed saray pikakasi tayo balet ta maanos a manalagar no panon so ikiwas nen Jehova.

Nayarin agdirektan onebat so Dios ed balang pikakasi, nisay lawas ya ebatan to iratan unong ed paraan odino diad panaon ya iilaloan tayo. Alimbawa, aminpiga ya impikasi nen Pablo so nipaakar ed “sabit ed laman” to. Ag-inekal na Dios so problema nen Pablo, antokaman itan, balet niligliwa toy Pablo ed onia iran makapabiskeg a salita: “Say grasyak so masarag la ed sika; ta say pakayarik agawan ayadyari ed kakapuyan.”​—2 Corinto 12:7-9.

Makapanmatalek itayo met ya anggano ag-ekalen na Dios so partikular a problema, sikato so ‘manggawa met na dalan a napaliisan tayo, pian nayarian tayon itepel itan.’ (1 Corinto 10:13) Magano lan paandien na Dios so amin a paniirapan na too. Diad peles a panaon balet, walay nagawaan na iyasingger tayo ed ‘Dumerengel na pikakasi.’​—Salmo 65:2.