Diad Tulong na Biblia, Aresistian To so Tukso

Amayamay so pakatuksoan diad mundo natan. Aliwan mainomay so pangitandoro ed saray estandarte na Biblia. Singa bilang, nayarin sakey ya angat so italineng ed simbawa na Biblia ya: “Ibatikan yo so lawanan.”​—1 Corinto 6:18.

Sakey ed saray Tasi nen Jehova, a tawagen tayo ed ngaran a Sebastian, so mantratrabaho ed sakey a kompanya na Scandinavia diad Polandiya. Kinaukolan to so mipuligesgesan pian napansiansia so katooran to.

Akabkabat si Sebastian bilang sakey a Tasi nen Jehova. Saray superbaysor to, a mangaapresya ed inkakuli tan maong ya ugali to, so angiter ed sikato na nanduruman pribilehyo. Balet, kabiangan manaya ed sarayan pribilehyo iray pimiting to nipaakar ed negosyo a nalalanor ditan so kuestionablin panagligliwaan.

Tampol a nanduaruwa si Sebastian. “Amta na amok a sakey ak a Tasi nen Jehova. Kanian sikato so manmamatalek tan maniilalo ed siak. No agak mibiang, naandian ak na trabaho, a mair-irap ya anapen. Anto kasi no man-imaton ak labat?”

Balet wala ni so naamtaan nen Sebastian. Sikato so iilaloan a “mangasikaso” ed saray sankailin kustomer diad pangiter to na “bibii” a nakaiba ran sanlabi. Anto kasi so gawaen to?

Denesidi nen Sebastian ya ipanonot ed superbaysor so nibase ed Biblia ya awawey to nipaakar ed imoralidad. Ag-abayag et alinewan ya agla onnepeg si Sebastian kanian kinaukolan to la so onekal ed trabaho to diad kaunoran. Sikatoy akaromog na balon trabaho a melag so sueldo balet anggapo iray ontan a pakatuksoan. Sikatoy walaan la natan na malinis a konsiensia.

Anto so gawaen mo no walay manesdes ed sika a mibiang odino mangonsenti ed imoralidad? Kasin mabulos kan manggawa na sigpot a pananguman? Ontan so ginawa nen Jose nensaman, unong a nikurit diad Genesis 39:7-12.