Akin a Mabetbet ya Ondadalaw ed Sikayo Iray Tasi nen Jehova?

DIAD sankamundoan, kabkabat so inkaseet na saray Tasi nen Jehova diad panagkabkaabungan a ministeryo. Mankelaw so arum a totoo no akin a mabetbet ya ondadalaw iray Tasi nen Jehova ed sikara, nagkalalo la no angipatnag ira na samet ya interes ed mensahe na saray Tasi. Say duaran sulat ed Russia so makapangipaliwawa ed satan.

Onia so inaksobi nen Masha, a 19 años a biin taga-Khabarovsk: “Diad tua et papaliisan ko nensaman iray Tasi nen Jehova a singano ra salot.” Balet, sanen abasa to so pigaran kopya na saray magasin ya impalapag na saray Tasi, anguman so awawey to. “Amin iratan so makapainteres tan makaibangat a tuloy,” so insulat nen Masha, “balet sankaimportantian, umanen na satan so panmoria na sakey a too nipaakar ed mundo. Kalkalnan atalosan ko no anto so gagala na bilay.”

Diad syudad na Ussuriysk, manga 80 kilometro manlapud amianen na Vladivostok, oniay insulat nen Svetlana: “Diad agano ni et ginapoan kon binasa so Say Panag-Bantayan tan Awake! Sarayan magasin so kakkaukolan a tuloy diad peles a panaon tayo. Nanggayagaan ko so amin ya artikulo. Saratan so makapainteres, napno na impormasyon, tan makaibangat a tuloy. Salamat ed sikayo! Pisalamatan kon tuloy so kiwawala yo ed sayan mundo tan say panggagawa yo ed satan a maabig tan makanakanan kimey.”

Saray Tasi nen Jehova ed interon mundo so mangipapapuso ed makatenyeg-kanonotan a tepet nen apostol Pablo: “Panon so pakadngel [na totoo] no anggapo so manangipulong?” (Roma 10:14) Akin ya agdengelen a magano iray Tasi no ondalaw ira lamet ed sikayo? Napanggayagaan yo met so makaligliwan mensahe a naromog ed Salita na Dios, say Biblia.