‘Agmanaayam so Dios ed Saray Templo a Ginawa na Lima’
ANDI-DUARUWAN kabisado nen apostol Pablo iray templo nen Athena, lapud naromog iraya diad dakel a syudad a binisita to legan na saray impanbaroy to bilang misionaryo. Unong ed The Encyclopædia Britannica, si Athena so bantog ya aliwa labat a bilang diosa na bakal tan kakabatan noagta diosa met “na saray inkadunong tan abilidad a mamawala na deen ed inkalapagan.”
Say sankabantogan a templo nen Athena et say Parthenon, ya impaalagey diad Atenas, say syudad ya inngaran ed satan a diosa. Bilang sakey ed saray sankabalgan a templo ed kadaanan a mundo, naromog ed Parthenon so 12 metro a gawa’d balitok tan garing ya estatua nen Athena. Sanen binmisita si Pablo ed Atenas, sayan amputin marmol a templo so sankatageyan la ed syudad diad loob na ngalngalin 500 a taon.
Lapud sankabantag so Parthenon, pinulongan nen Pablo so sakey a grupo na saray taga-Atenas nipaakar ed say ‘Dios ya agmanaayam ed saray templo a ginawa na lima.’ (Gawa 17:23, 24) Nayarin lapud kinaatagey na saray templo nen Atenas odino kinabaleg na saray talintao to kanian ompatnag a sikatoy mas pandinayewan na arum a dumerengel nen Pablo nen say agnanengneng a Dios ya agda kabat. Balet, unong ya impabitar nen Pablo, nepeg ya ag-isipen a say Amalsa ed katooan et “mipara ed balitok, odino pilak, odino bato, odino talintao a ginawa na . . . too.”—Gawa 17:29.
Saray dios tan diosa a singa si Athena—ya akadepende so karlangan da diad saray templo tan estatua—so niwala insan naandi. Say estatua nen Athena so naandi ed Parthenon nen komaliman siglo K.P., tan saray geray labat na pigaran templo to so wala ni anggad natan. Siopa natan so maniilalo ed si Athena parad kakabatan tan panangiwanwan?
Agaylan midumaan ed si Jehova, say “andi-anggaan a Dios” ya anggapo ni so too ya akanengneng. (Roma 16:26; 1 Juan 4:12) Oniay insulat na saray ilalak nen Core: “Saya a Dios sikato so Dios tayo ed ando lan ando: sikato so manangibasbas tayo.” (Salmo 48:14) Say sakey a paraan pian napanggayagaan so panangiwanwan nen Jehova et diad panaral ed Salita to, say Biblia, tan pangiyaplika ed simbawa na satan diad bilay tayo.