Kasin Babayuboan Mo so Liknaan a Pankelkelaw?

NAIIMANOM ta a saray managsulat na Biblia so naynay a mangibabalikas na pankelkelaw sano bibidbiren da iray kimey tan atributos na Dios? “Makapakelkelaw so inkagawa na inkasiak,” so inyabawag na salmista. (Salmo 139:14) “O Jehova,” so insulat nen propetan Isaias, “sika so Dios ko; sika so paatageyen ko, igalang ko naani ngaran mo; ta nanggawa ka na saray makapakelaw.” (Isaias 25:1) Odino isipen pa so pankelkelaw tan pandinayew a nibalikas ed saray salita nen apostol Pablo: “O say kaaralman na kayamanan na kakabatan tan pakaamta na Dios!”​—Roma 11:33.

Inukeran na The Oxford Encyclopedic English Dictionary so salitan “pankelkelaw” bilang “sakey a liknaan ya asagyat ed ag-inilaloan, agkabat, odino agnipaliwawa, nagkalalo la ed pakasurprisa ya atekepan na pandinayew odino inkamausisa tan arum nira.”

Agta makapaliket so pakaimaton ed melag ya ugugaw a mankelkelaw sano nanengneng, nalikna, odino narengel da iray bengatlan balo ed sikara? Makapaermen ta say ontan a pankelaw a base ed inkamausisa odino lapud balo a bengatla so agla tanto napapatnagan diad ilalabas na saray taon.

Balet, parad saray managsulat na Biblia a tinukoy ed tagey et nisipor la ed sikara so liknaan a pankelkelaw. Satan so agkinmapuy. Akin ya ontan? Binayuboan da so liknaan a pankelkelaw diad maapresyan impandalepdep ed saray kimey na Dios. Oniay impikasi na salmista: “Nonodnonoten ko iray linmabas a taotaon, dadalepdepen ko so amin a ginawgawam; saray pankelkelawan a palsam so pinonot ko.”​—Salmo 143:5, The New English Bible.

Agaylan nakomendaan iray modernon-agew a managdayew ed Dios lapud napapatnagan ed sikara iyan liknaan a pankelkelaw! Kasin walaan ka met na satan? Kasin babayuboan mo itan?