“Naimatonan Ko so Pankakaaro, Panangaro, tan Panangimano”

“LAPU ed saya amin a too nabidbiran da a sikayoray babangatan ko, no wala so aro yo ed sakey tan sakey.” (Juan 13:35) Unong ya imbaga la nen Jesus, say aro so nagmaliw a pakabidbiran na inmunan Kristianon impanaagi. Si Tertullian, a nansulat kayari na masulok a sanlasus a taon na impatey nen Kristo, so angaon ed imbaga na saray akaimaton: ‘Nengneng yo no panon so panaaroan da tan no panoy inkamabulos da ni ingen ya ompatey nisengeg ed sakey tan sakey.’

Kasin naromogan ni itan a klase na aro diad mundo? On. Alimbawa, imanoen so sakey a sulat ya impawit ed sangan opisina na saray Tasi nen Jehova diad Brazil. Oniay insulat na sakey a biin manngaran na Marília:

“Legan a manaayam kami ed Villa Mercedes, Argentina, say nanay ko, a sakey ed saray Tasi nen Jehova, so awalaan na sakit ya osteoarthritis, a sengegan na inkaparalisado to manlapud awak a paleksab. Diad primeron waloy bulan na impansakit to, saray Tasi ed Villa Mercedes so maaro tan maanos ya angasikaso ed sikato. Inasikaso ra so amin a bengatla, nilinisan da so ayaman to tan inlutoan da na saray naakan to. Anggan sanen wala ni ed ospital, naynay a wala so manbabantay ed si Nanay, agew tan labi.

“Sanen pinmawil kami nen Nanay diad Brazil, sikato nin siansia so manpapaabig ed sakit to. Saray Tasi ed panaayaman mi natan et gagawaen day anggaan na nayarian da pian tulongan ya onabig si Nanay.”

Sinampotan nen Marília so sulat to: “Aksobien ko ya aliwa ak a Tasi, balet naimatonan ko so pankakaaro, panangaro, tan panangimano ed limog na saray Tasi.”

On, wala nin siansia iray totoo a mangipapatnag na tuan panangaro bilang Kristiano. Diad panggagawa ra ed satan, ipapatnag da so mabiskeg ya impluensya na saray bangat nen Jesus ed kabibilay da.