Sano Saray Sipan so Segurado lan Natoor

SAY awaran so napno na saray ag-asumpal a sipan. Mabetbet ya agtotooren na saray nasyon iray sipan da a paliisan so pambabakal, anggaman saraya so masimoon a pinirmaan da, a nanresulta ed inkipaarap na totoo ra ed teriblin pambabakal. Oniay aminsan ya imbaga nen Napoleon: “Tooren labat na saray gobierno iray sipan da sano napaskar iran manggawa ed satan, odino sano pakagunggonaan da itan.”

Komusta balet iray isisipan na saray indibidual? Agaylan makapadismaya sano agtooren na sakey a too so insipan to! Nagkalalo la no sikato so kabkabat tan panmamatalekan yo. Siempre, saray totoo so balanglan agmakayari odino agmabulos a manumpal ed saray sipan da.

Agaylan mandumaan iray sipan na too tan saray sipan na Dios! Saray sipan na Dios so sigpot a nailaloan tan napanmatalkan. Antokaman ya insipan nen Jehova et seguradon natoor. Peteg a nasumpal itan. Diad panutukoy ed ag-onsaew a salita na Dios, oniay ibabaga na Isaias 55:11: “Ontan met naani so salitak ya ompaway ed sangik; sikato naani ag-ompawil ed siak a paoypaoy, noag ingen sumpalen to naani so kaliktan ko, tan onaligwas naani ed bengatla a pangiyakaran ko ed sikato.”

Kanian, panon sirin so nepeg a panmoria tayo ed saray sipan na Dios a nikurit ed Biblia? Peteg a napanmatalekan tayo iratan. Singa bilang, oniay insulat nen apostol Juan: “Nia, so tabernakulo na Dios wala ed saray totoo, tan sikato so manayam naani ed sikara, tan sikara naani baley to, tan say Dios met lanlamang so wala naani ed sikara tan Dios da: Tan punasen to so amin a lua ed kamataan da; tan anggapo la naani ipatey; tan anggapo la naani onnangis o dageyem, o ot-ot: ta saray una a bengatla sikara so linmabas la.” (Apocalipsis 21:3, 4) Napanggayagaan yo iratan a bendisyon no onkiwas kayo unong ed saray salita nen Jesus: “Saya sikato so andi-anggaan a bilay, a naamtaan da ka a saksakey a tuan Dios, tan saman so imbakim, salanti [si] Jesu-Kristo.”​—Juan 17:3.