Importantin Maong so Aro

ANTOKAMAN so edad, kultura, lenguahe, odino rasa, amin a totoo so mankaukolan a maong na panangaro. No ag-itan napenek a pankaukolan, aliwa ran maliket. Oniay insulat na sakey a managsukimat ed medisina: “Importante so aro tan inkamaapit diad panetermina no anto so sengegay pansasakit tayo tan no anto so mamaabig ed sikatayo, no anto so sengegay panermen tan no anto so mamaliket, no anto so mamairap ed sikatayo tan no anto so mamainawa. No walaan na ontan ya epekto so sakey a balon tambal, ngalngalin amin a doktor diad bansa so mangirekomenda ed satan ed saray pasyente ra. Aliwan duga so panagtambal no ag-itan iresita.”

Anggaman kuan, say modernon sosyedad, nagkalautla ed media tan saray dederlengen a modelo na satan, so mabetbet a mangipupurek ed kayamanan, pakayari, inkabantog, tan pisesekso a nagkalalo nen say pankaukolan na too parad maligsa tan maaro iran siglaotan. Dakel ya edukador so mangipupurek ed sekular iran kalat tan karera, ya ibabase so itatalona unong ed pakagamor na saratan. Tua ya importante so edukasyon tan say pamaaligwas na sakey ed saray abilidad to, balet kasin saratan labat la so kaukolan a gegemtanen na sakey a too ya agla mangipanaon parad pamilya tan kakaaro to? Sakey ya edukadon managsulat nensaman a maimanon tuloy nipaakar ed inkatoo so angiyaliling ed toon maabilidad balet ta andian na panangaro bilang “mantaknol a gansa odino manbanengbeng a piangpiang.” (1 Corinto 13:1) Say ontan a totoo so nayarin onyaman, ombantog ni ingen, balet agbalot magmaliw a peteg a maliket.

Si Jesu-Kristo, a walaay aralem a pakatalos tan nikaduman panamabli ed totoo, so angipasen a manunaan ed panangaro ed Dios tan ed kaparan too ed bangat to. Inkuanto: “Aroen mo so Katawan a Dios mo ed masimoon a pusom, tan dia ed masimoon a kamarerwam, tan dia ed masimoon a nonot mo. . . . Aroen mo so kaparam a too unong ed sikan dili.” (Mateo 22:37-39) Saraman lambengat so manguunor ed sarayan salita so magmaliw a tuan papatumbok nen Jesus. Kanian, inkuanto: “Lapu ed saya amin a too nabidbiran da a sikayo ray babangatan ko, no wala so aro yo ed sakey tan sakey.”​—Juan 13:35.

Balet, panon a bayuboan na sakey a too so aro ed sayan peles a mundo? Tan panon a nibangat na atateng ed ananak da so aro? Say ontumbok ya artikulo so mangebat ed sarayan tepet.

[Saray litrato ed pahina 3]

Sakey ya angat so pamayubo ed aro diad mundon ontatalona so agum