Kustombre Labat Odino Panagpasuksok?

DIAD pigaran kolehyo ed Polandiya, niyugali la na saray estudyante so mankolekta na kuarta pian isaliwan na regalo iray mamaestro odino mamaestra ra, ya iilaloan dan makala ira na atagey a marka diad saray eksamin da. Agpankelawan sirin a nipaarap ed mairap a kipapasen so sakey a Kristianon kalangweran a si Katarzyna. “Mangiter ak na kuarta odino andi?” so inumameng to. Oniay inkatunongan na saray kaklase to: “Kaslakan la iyan kustombre. Anggapo met so naandi ed sika, dakel ni ingen so nagunggonam, kanian akin a manduaruwa ka?”

“Aminen ko a diad inmunan taon na panaaral ko et siak so akibiang ed panagkolektay kuarta,” so inaksobi nen Katarzyna. “Diad saginonor ko labat amoria a sinuportaan ko manaya so panagpasuksok, a kokondenaen diad Biblia.” Anonotan to iray tekston mangipapabitar a kokondenaen nen Jehova so panagpasuksok. (Deuteronomio 10:17; 16:19; 2 Awaran 19:7) Inkuan nen Katarzyna: “Atebek ko ya agaylan inomay so nasagyat ed pananesdes na kalimog. Ninonot kon maong so pamaakaran tan nanlapula’d saman et agak lan balot akibiang ed sayan kustombre.” Diad inlabas na taloy taon, anggaman ed panagludlurey na arum ya estudyante, ayarian ton impaliwawa ed arum ya agto mibibiang ed sarayan panagkolekta na “regalo” lapu ed nibase’d Biblia iran kombiksion to.

Inakusaan na arum si Katarzyna a sikatoy masiblet tan agmarunong a miulop. “Siak so bubusolen nin siansia na arum ed sikara,” so kuanto. “Diad biek a dapag, dakel so manrerespeto ed panmoriak, a panliliketan ko itan.” Si Katarzyna so kabkabat bilang sakey ed saray Tasi nen Jehova, a manguunor ed saray prinsipyo na Biblia diad inagew-agew a kabibilay to.