Tepetepet Manlapud Saray Managbasa

Kasin nayari so manggawa na uksoyan no say sakey a maletey la ya alanaan a Kristiano et agto la sarag so onatendi ed Pangdem na Katawan a selebraan na kongregasyon?

On. Walay nagawaan tan nepeg a gawaen bilang konsiderasyon ed sakey ya alanaan a Kristiano ya agmakaatendi lapud maletey la sano selebraan na kongregasyon so Memoryal na impatey nen Kristo. Diad ontan a kipapasen, nayarin manuro so ulop na mamatatken na sakey a matatken odino sakey a maespiritual a Kristianon laki a mangawit na embleman tinapay tan alak ed satan a kapananisiaan diad satan lanlamang a labi antis ya ombutay so agew.

Say ombibisitan matatken odino sananey ya agin laki so mankomento na antikey tan manbasa na saray matukoy a teksto, depende ed saray kipapasen. Nayarian ton tumboken so padron ya inletneg nen Jesus sanen ginapoan To so Pangdem na Katawan. Singa bilang, nayarin ibasa to so Mateo 26:26 tan iparungtal so anggapoy lebaduran tinapay kayari pikakasi. Kayari na satan, nayarin ibasa na ombibisitan agin laki so Mateo kapitulo 26, bersikulo 27 tan 28, insan to iparungtal so alak kayari na sananey nin pikakasi. Nayarin mankomento na antikey nipaakar ed kakanaan na kada emblema, tan matukoy so pansaran pikakasi.

Siempre, kaukolan so makatunongan a pansagpot pian makaatendi ed Pangdem na Katawan a selebraan na kongregasyon. Balet anto so nayarin gawaen ed saray nikadkaduman situasyon a nalalanor so sakey ya alanaan a Kristiano a graben mansasakit, naospital, odino naamper ed panselebra na Memoryal kaselek na agew diad Nisan 14? Nayarin tumboken na satan ya alanaan so pangaligan ed Mosaikon Ganggan tan selebraan itan a pribado kayari na 30 agew.​—Numeros 9:9-14.