“Samet Labat so Amtak Nipaakar ed Dios”

“MANLAPU nen apalabas a taon, dadalawen ak na saray Tasi nen Jehova tan inanabang da so makapalikliket a balita nipaakar ed Panarian na Dios. Waloy taon ko lan Katoliko, balet samet labat so amtak nipaakar ed Dios. Diad loob na sayan sakey taon lambengat et dakel la so naaralan ko,” so insulat na sakey a laki a taga Kerala, India. “Malikeliket ak ed impakaamtan Say Panag-Bantayan so nipapalapag ed 139 [natan et 146] a lenguahe,” so intuloy to. “Makapakelaw a saray totoo ed amin a grupo na lenguahe so makakaamta ed mensahe nipaakar ed Dios.”

Anggaman ipipilit na dakel a pilosopo ya imposiblin nakabat so Dios, malinlinew ya impaimano nen apostol Pablo a satan so posibli. Diad pangipapaimano to ed grupo na saray taga-Atenas, ya arum ed saratan so manlilingkor ed altar ya indedika ed “Dios ya Ag-amta,” et oniay inkuan nen Pablo: “Saman sirin so igalgalang yo ya agyo amta, sikato so ipakabat ko ed sikayo. Say Dios a nanggawa ed mundo tan saray amin a bengatla a wala ed sikato . . . so mangiter ed amin na bilay, say linawa, tan ami-ami bengatla. Et dia ed saksakey a too ginawa to a pansengegan na amin a nasyones na saray totoo, pian manayam ira ed amin a tapew na dalin.”​—Gawa 17:23-26.

Pinaseseg nen Pablo iray onderengel ed sikato a panggunaetan dan kabaten so Manamalsa, lapud “sikato so . . . ag-arawi ed sinansakey ed sikatayo.” (Gawa 17:27) Maliket iray Tasi nen Jehova ya ontulong ed sikayo pian nakabat yo so tuan Dios tan say makapasagyat iran kalidad to.