“Saray Taloran Makabat a Lalaki”​—Siopa Ira?

Kaslakan lan ipaparungtal na saray eksena ed Belen iray taloran lalaki ya akakawes na andukey tan akalugan ed kamelyo, ya onsasabi diad siroman na ayayep a kawalaan na kapangiyanak a Jesus, ya akarukol ed kuwadra. Saray bisita ya akakawes na mararakep so kaslakan lan natatawag a taloran makabat a lalaki. Anto ta so ibabaga na Biblia nipaakar ed sikara?

Unong ed Biblia, saray ibabagan makabat a lalaki so ‘nanlapu ed letakan,’ a diman da akabatan so inkianak nen Jesus. (Mateo 2:1, 2, 9) Maseguron abayag so impanbaroy na sarayan lalaki ya amaarap ed Judea. Sanen aromog da si Jesus, sikatoy aliwa lan kapangiyanak a wala ed siroman na ayayep. Imbes, aromog da si Maria tan “say ugaw” a manaayam la ed sakey ya abung.​—Mateo 2:11.

Tatawagen na Biblia irayan lalaki a mago odino “astrologo,” balet agsasaglawien na satan no pigara ira. Oniay isasalaysay na The Oxford Companion to the Bible: “Say siglaotan ed baetan na mahiko tan astrolohiya so napatnagan diad impakasagyat na saray bisita ed bitewen ya angipaarap ed sikara ed Betlehem.” Say Biblia so malinew a mangokondena ed amin a nengneng na mahiko tan ed Binababilonian agamil a panangala na impormasyon panamegley na saray bitewen.​—Deuteronomio 8:10-12; Isaias 47:13.

Anggapoy marakep a nansumpalan na impormasyon a nipasabi ed sarayan lalaki. Satan so amasanok ed si Arin Herodes tekep na imon. Insan nanresulta iya ed imbatik di Jose, Maria, tan Jesus ed Ehipto tan impamatey ed amin a lalakin ugugaw diad Betlehem a “mantaon na duaran taon tan mamaleksab.” Maalwar a sineguro nen Herodes so petsa na kianak nen Jesus base’d samay akabatan to ed saray astrologo. (Mateo 2:16) Nisesengeg ed amin a gulon pinawala na imbisita ra, makatunongan labat ya ibagan say bitewen ya anengneng da tan say mensahe a nipaakar ed “nianak ya Ari na saray Judios” so nanlapud kabusol na Dios, si Satanas a Diablo, a malabay a mamatey ed si Jesus.​—Mateo 2:1, 2.