“Magmaliw a Makabat ed Arapen Mo”

“Nanliketan la na karaklan a katooan iray inmunan taon na bilay da kanian nanermenan da lay unor iran taon na bilay da.” Ontan so inkuan nen Jean de La Bruyère, say koma-17 siglon essayist a Pranses. On, nayarin agmakadesisyon so sakey a kalangweran, kanian agla makapankontento tan makalikna lay kaermenan. Diad biek a dapag, nayarin ilolot na sakey a benger a tobonbalo so agmakabat a kurang, a mamaermen ed bilay to’d arapen. Dinanman ed satan, say agpanggaway maong odino say panggaway krimen so mansumpal ed pirmin sinagem.

Panon komon a napaliisan itan? Bilang pasakbay ed agpakadesisyon legan na inkatobonbalo, oniay insimbawa na Salitay Dios ed saray kalangweran: “Nonoten mo met so Manamalsam dia ed saray agew na inkaugaw mo, ed arapen a saray mauges ya agew onsabi, tan saray taon onasingger ira, sano ikuan mo, Andian ak na liket ed sikara.” (Eclesiastes 12:1) No sakey kan tobonbalo, mamasya kan manaral nipaakar ed “Manamalsam” ambegyan ugaw ka ni.

Panon sirin ya ontulong so Biblia ed kalangweran pian napaliisay inuugaw ya ugali? Inkuanto: “Dengelen mo so simbawa, tan awaten mo so panangibangat, pian onkabat ka, ed kaunoran a kasampotan mo.” (Uliran 19:20) Malinew ya impatnag met na Biblia a say pangipulisay ed maridios a kakabatan lapud impamaulyan odino impanrebeldi legan na inkatobonbalo, odino ed dinanman ya edad, so mansumpal ed kaermenan. (Uliran 13:18) Diad piduma, say itulok ed panangiwanwan na Dios so manresulta ed “karukey na saray agew, tan saray taon na bilay, tan kareenan,” salanti, makapaliket tan makapnek a bilay.​—Uliran 3:2.