“Itonton Toak ed Abay na Saray Mareen a Danudanum”
DIAD ampetang a tiempo ed saray rehyon ya asalambit ed Biblia, kaukolan na saray karnero so uninum ya inagew-agew. Kanian, importantin kabiangan ed trabaho na managpastol so pamainum ed saray pulok to. No maminsan saray managpastol so mamainum ed saray pulok da manlapud bobon, ya ikalbo so danum diad saray atotong ta pian makainum iray karnero. (Genesis 29:1-3) Balet, nagkalautla ed tiempo na mamauran, say lugar ed kaliberliber na melag iran kulos tan ilog so mangitatarya na mareen tan “maranum iran panagpainawaan.”—Salmo 23:2, NW.
Kaukolan a kabisado na managpastol no iner so pakaromogan toy danum tan marakep a pangipastolan ed saray pulok to. Say pikabisado ton maong ed sakey a lugar so maneguro ed pambilay na saray karnero to. Inkompara nen David, a dakel a taon a nampapastol ed saray karnero diad saray pukdol na Judea, so espiritual a panangiwanwan na Dios ed managpastol a mangitotonton ed saray karnero to ed maong a panagpastolan tan ed manangiter-bilay a danum. “Itotonton toak ed abay na saray mareen a danudanum,” so inkuan nen David.—Salmo 23:1-3.
Diad inlabas na saray taon, diad panamegley na propeta ton Ezequiel, angusar si Jehova na mipadparan ilustrasyon. Insipan ton tiponen so totoo to manlapud saray rehyon a nitaytayakan da, a singa managpastol a manitipon ed saray karnero to. “Pakanen ko ra naani ed tapew na saray palandey na Israel, ed abay na saray panag-agusan na danudanum,” so impaseguro to ed sikara.—Ezequiel 34:13.
Mapaga met a maong si Jehova a Dios ed pangitarya na espiritual a danum. Dedeskribien na libron Apocalipsis so “ilog na danum na bilay” ya onaagus manlapud trono na Dios. (Apocalipsis 22:1) Say imbitasyon ya uninum ed sayan ilog so ninanatnat ed amin a totoo. “Say malabay, mangala ed danum na bilay ya andi bayar.”—Apocalipsis 22:17.
Sayan simbolikon danum na bilay so mangirerepresenta ed saray probisyon na Dios parad andi-anggaan a bilay. Siopaman so nayarin uninum manlapud satan a danum diad ‘pangala na pikakabat ed saksakey a tuan Dios tan ed sakey ya imbaki to, si Jesu-Kristo.’—Juan 17:3, NW.