“Amta Yo No Akin ya Ipapawil Koy Kuarta Yo?”

‘TALAGAN kakkaukolan koy kuarta!’ ontan so inisip nen Nana, sakey a mansusulon ina a walaay taloran anak a lalaki a manaayam ed Kaspi diad Republika na Georgia. Sakey a kabuasan et tinmua so pirawat to. Sikatoy akaromog na 300 a lari (US $150) ed abay na istasyon na polisya. Anggapo so akanengneng ed sikato tan balbaleg a kantidad iman. Diad tua et satan so primeron impakanengneng nen Nana na kuartan papel a 100 a lari ed loob na limaran taon a satan so nagmaliw lan say nisisirkulan kuarta ed bansa. Anggan saray negosyante ed lokal so agmakalmo na ontan a kantidad diad loob na pigaran taon.

‘Antoy gunggonak ed sayan kuarta no nabalang koy pananisiak, maridios a takot ko, tan say espiritualidad ko?’ Ontan so ninonot nen Nana. Abayuboan to la iratan a Kristianon kalidad, a sinungdoan to ni ingen so panamasegsegang tan panamekpek lapud pananisia to.

Diad inyakar to ed istasyon na polisya, asabian toy limaran polis a desperadon manaanap na sakey a bengatla. Amoria ton aanapen da so kuarta, kanian inasinggeran to ira tan inkuanto: “Wala tay abalang yo?”

“Kuarta,” so inyebat da.

“Pigara?”

“Talon lasus a lari!”

“Aromog koy kuarta yo,” inkuan nen Nana. Insan intepet to: “Amta yo no akin ya ipapawil koy kuarta yo?” Agda amta.

“Lapud sakey ak ed saray Tastasi nen Jehova,” intuloy ton inkuan. “No aliwa ak a Tasi, agko la ipawil so kuarta yo.”

Bilang apresasyon ed matuan kondukta nen Nana, say hepe na polis ya akabalang ed kuarta so angiter ed sikato na 20 a lari.

Maples a nibalita ed interon distrito na Kaspi so agawa. Diad kaimbuasan, sakey a biin managlinis a nanlapud istasyon na polisya so angistorya ed si Nana: “[Say hepe] so lawas a mangisisimpen na literatura yo ed opisina to. Seguro natan et lalon pablien to la so literatura yo.” Onia ni ingen so inkuan na sakey a polis: “No amin a totoo et Tastasi nen Jehova, siopa ni so manggawa na krimen?”