Kasin Natetebek Mo so Aro na Dios?

AMINSAN et deneskribe nen Job so ag-ayadyarin kipapasen na too ed oniaran salita: “Say too nianak ed bii, daiset so saray agew to, tan napno ed gonigon. Ompaway a singa bolaklak, tan sikato so nasipi; ombatik met a singa anino, tan agmagnayon.” (Job 14:1, 2) Say bilay, unong a naeksperiensya nen Job nensaman, so napno na egagel tan ermen. Kasin aliknam la so ontan?

Balet, anggaman ed amin a kairapan tan problema a nayarin kidungetan tayo, wala so putel ya ilalo, a nibase ed panangasi tan aro na Dios. Manuna’d amin, say mapangasin mangatatawen ya Ama tayo so angitarya na dondon bagat pian dondonen so katooan manlapud makabos, makasalanan a kipapasen da. Unong ed Juan 3:16, 17, inkuan nen Jesu-Kristo: “Ontan lay impangaro na Dios ed mundo [na katooan], ya inter to so bogbogtong ya Anak to, pian siopaman a manisia ed sikato agnatawtaw, noag ingen wala so bilay ton andi-anggaan. Ta say Dios agto imbaki so Anak [to a Jesus] ed mundo a mangukom ed mundo; noag ingen pian say mundo nilaban ed panamegley to.”

Konsideraen met so mapangasin awawey na Dios ed sikatayoran ag-ayadyarin totoo. Oniay inyabawag nen apostol Pablo: “Dia ed saksakey a too ginawa to a pansengegan na amin a nasyones na saray totoo, pian manayam ira ed amin a tapew na dalin, unong a tinandaan to so pansasaginonor na panaon, tan saray panganggaan na panag-ayaman da; pian anapen da so Dios, ompan dia ed pankarkarapas da, sikato so naromog da, anggan wala ed ag-arawi ed sinansakey ed sikatayo.” (Gawa 17:26, 27) Isipen pa itan! Anggaman ag-itayo ayadyarin totoo, siansian napanggayagaan tayo so personal a pisisiglaotan ed maaron Manamalsa tayo, si Jehova a Dios.

Sirin, naarap tayo so arapen tekep na kompiyansa, lapud amta tayon say Dios so manatalima ed sikatayo tan maaron angitarya na probisyon parad maandon pankaabigan tayo. (1 Pedro 5:7; 2 Pedro 3:13) Sirin, seguradon wala’d sikatayoy amin a rason pian amtaen nin nagkalalo so nipaakar ed maaron Dios tayo panamegley na panaral na Salita to, say Biblia.